പാവയ്ക്ക എന്ന് കേട്ടാൽ തന്നെ പലരുടെയും നെറ്റി ചുളിക്കും. കയ്പ്പ് തന്നെയാണ് ഇതിന് പിന്നിലെ കാരണം. ഏറെ ആരോഗ്യഗുണങ്ങൾ ഉള്ള പച്ചക്കറിയാണ് എന്ന് അറിയാമെങ്കിലും പലർക്കും പാവയ്ക്കയോട് അവഗണനയാണ്. എന്നാൽ ഈ കയ്പ്പക്കയുടെ കയ്പ്പിനെ തുരത്താൻ ഈ വഴികൾ പരീക്ഷിച്ചാൽ മതി. പാവയ്ക്ക് കറി വെക്കുമ്പോൾ അൽപ്പം ശ്രദ്ധ കൊടുക്കേണ്ട കാര്യമേ ഉള്ളൂ.
പാവയ്ക്ക അരിഞ്ഞതിന് ശേഷം ഉപ്പ് ചേർത്ത് തിരുമ്മുക. വെള്ളം ചേർക്കാതെ വേണം ഇങ്ങനെ ചെയ്യാൻ. നന്നായി യോജിപ്പിച്ചതിന് ശേഷം പാത്രത്തിൽ നിന്നും വെള്ളം ഊർന്ന് വരുന്നതുവരെ വെയ്ക്കുക. നാല്-അഞ്ച് മിനിറ്റ് കഴിയുമ്പോൾ പാവയ്ക്കയിൽ നിന്ന് പച്ചനിറത്തിൽ നീരു വരും. ഇത്തരത്തിൽ രണ്ടോ മൂന്നോ വട്ടം ചെയ്യുക. ഇത് തോരനോ മെഴുക്കുപുരട്ടിയോ ആയി പാകം ചെയ്യാവുന്നതാണ്.
തോരന് വേണ്ടി അരിയുമ്പോൾ ഉള്ളിലെ കുരുവും വെള്ള പാടയും നന്നായി കളഞ്ഞിട്ടുണ്ടെന്ന് ഉറപ്പ് വരുത്തുക. അരിഞ്ഞുവെച്ച പാവയ്ക്കയിൽ കല്ലുപ്പും മഞ്ഞൾ പൊടിയും വിതറിയ ശേഷം ഇളക്കുക. ഒരു മണിക്കൂറിന് ശേഷം വേവിച്ചെടുത്താൽ കയ്പ്പ് ഒഴിവായി കിട്ടും. ഒരു മണിക്കൂറോളം ഇരിക്കുമ്പോൾ പാവയ്ക്കയിൽ നിന്ന് വെള്ളം ഊർന്ന് വരും. ഈ വെള്ളം മതി പാവയ്ക്ക് വേവാൻ.
കയ്പ്പൻ പാവയ്ക്കയുടെ ചവർപ്പ് പോകാൻ അൽപ്പം നാരാങ്ങാനീര് ചേർത്ത് കറി വെച്ചാൽ മതിയാകും. തീയൽ വെക്കുന്നതിന് മികച്ച ഓപ്ഷനാണ് പാവയ്ക്ക. ഇതിനായി ആദ്യം പാവയ്ക്ക വഴറ്റുക. തുടർന്ന് പുളി പിഴിഞ്ഞ് ഉപ്പും ചേർത്ത് തിളപ്പിക്കുക. ഇതിൽ പാവയ്ക്ക അതിലിട്ട് വേവിച്ചാൽ കയ്പ്പ് ഒട്ടും കാണുകയില്ല.
പാവയ്ക്ക അരിഞ്ഞ് പുളിയുള്ള തൈരിൽ മുക്കി വെക്കുന്നതും കയ്പ്പ് അകറ്റാൻ മികച്ചതാണ്. പുളിവെള്ളത്തിൽ മുക്കി വെച്ചതിന് ശേഷം പാവയക്ക കറി വെക്കുന്നതും കയ്പ്പ് കുറയ്ക്കും. തോരനിൽ അധികമായി സവോള ചേർക്കുന്നതും നല്ലതാണ്. വിനാഗിരിയും പഞ്ചസാരയും ഒന്നിച്ച് ചൂടാക്കി, പാവയ്ക്കയിൽ ചേർത്ത് തിരുമ്മി വെക്കുന്നത് കയ്പ്പ് കുറയ്ക്കാൻ സഹായിക്കും.
