മിക്ക വീടുകളിലും ഗ്യാസിന് പുറമെ പാചകത്തിനായി ആശ്രയിക്കുന്ന ഉപരകരണമാണ് ഇൻഡക്ഷൻ കുക്കർ. അടുക്കള ഭരിക്കുന്ന ഇലക്ട്രോണിക് ഉപകരണങ്ങളിൽ മുൻപന്തിയിൽ നിൽക്കുന്ന ഇൻഡക്ഷൻ കുക്കർ പാചക കാര്യങ്ങൾക്ക് മികച്ചതല്ലെന്നാണ് കെഎസ്ഇബിയുടെ മുന്നറിയിപ്പ്. കാരണങ്ങൾ അറിയാം..
കൂടുതൽ സമയം ഇൻഡക്ഷൻ കുക്കർ ഉപയോഗിച്ച് പാചകം ചെയ്യുന്നത് മണിക്കൂറിൽ 1.5 മുതൽ 2 യൂണിറ്റ് വരെ വൈദ്യുതി ചെലവാക്കുന്നുണ്ടെന്നാണ് കെഎസ്ഇബിയിടെ അറിയിപ്പിൽ പറയുന്നത്. 1,500 മുതൽ 2,000 വാട്സ് ആണ് ഇൻഡക്ഷൻ കുക്കറിന്റെ പവർ റേറ്റിംഗ്. ഇത് അമിതമായി വൈദ്യുതി ചാർജ് ഈടാക്കുന്നതിന് കാരണമാകുന്നുവെന്ന് കെഎസ്ഇബി പറയുന്നു. ഇൻഡക്ഷൻ കുക്കർ ഫലപ്രദമായി ഉപയോഗിക്കുന്നത് സംബന്ധിച്ചുള്ള ഫേസ്ബുക്ക് പോസ്റ്റും കെഎസ്ഇബി പങ്കുവെച്ചു.
ഫേസ്ബുക്ക് പോസ്റ്റ്
ഇൻഡക്ഷൻ കുക്കർ ഉപയോഗിക്കുമ്പോൾ 1,500- 2,000 വാട്സ് ആണ് സാധാരണ ഒരു സ്റ്റവിന്റെ പവർ റേറ്റിംഗ്. അതായത് ഒരു മണിക്കൂർ ഉപയോഗിക്കുമ്പോൾ 1.5 മുതൽ 2 യൂണിറ്റ് വരെ വൈദ്യുതി ചെലവാകുന്നു. അതിനാൽ കൂടുതൽ നേരം പാചകം ചെയ്യേണ്ട ആവശ്യങ്ങൾക്ക് ഇൻഡക്ഷൻ കുക്കർ അനുയോജ്യമല്ല. കുക്കറിന്റെ പ്രതലത്തിൽ കാണിച്ചിരിക്കുന്ന വൃത്തത്തിനെക്കാൾ കുറഞ്ഞ അടി വട്ടമുള്ള പാത്രങ്ങൾ ഉപയോഗിക്കാതിരിക്കുക. പാചകത്തിന് ആവശ്യമുള്ള അളവിൽ മാത്രം വെള്ളം ഉപയോഗിക്കുക. വെള്ളം തിളച്ചതിന് ശേഷം ഇൻഡക്ഷൻ കുക്കറിന്റെ പവർ കുറയ്ക്കാവുന്നാതാണ്. പാചകത്തിന് പാത്രം വെച്ചതിന് ശേഷം മാത്രം കുക്കർ ഓൺ ചെയ്യുക. അതുപോലെ ഇൻഡക്ഷൻ കുക്കർ ഓഫ് ചെയ്തതിനു ശേഷം മാത്രം പാത്രം മാറ്റുക.- കെഎസ്ഇബി കുറിച്ചു
സംസ്ഥാനത്ത് വൈദ്യുത നിരക്ക് വർദ്ധിപ്പിക്കുമെന്ന് കേരള സർക്കാരിന്റെ പ്രഖ്യാപനത്തിന് പിന്നാലെയാണ് ഇപ്പോൾ കെഎസ്ഇബി ഈ മുന്നറിയിപ്പ് പങ്കുവെച്ചിരിക്കുന്നത്.
