തിരുവനന്തപുരം: പിഎസ്സി ഉദ്യോഗാർത്ഥികൾക്ക് തിരിച്ചടി സൃഷ്ടിച്ച് ബിവ്റേജസ് കോർപ്പറേഷനിൽ കൂട്ടസ്ഥിരപ്പെടുത്തൽ. 995 താൽക്കാലിക ജീവനക്കാരെ സ്ഥിരപ്പെടുത്താനാണ് തീരുമാനം. എൽഡിസി, യുഡിസി സമാന തസ്തികകളിൽ ജോലി ചെയ്യുന്നവർക്കാകും സ്ഥിരനിയമനം. ബെവ്കോ ഡയറക്ടർ ബോർഡിന്റേയാണ് തീരുമാനം.
ചാരായഷാപ്പുകൾ പൂട്ടിയപ്പോൾ ബിവ്റേജിൽ ജോലി ലഭിച്ചവരും ആശ്രിത നിയമനത്തിലൂടെ താൽക്കാലിക ജോലിയിൽ പ്രവേശിച്ചവരും ഔട്ട്ലറ്റുകളിൽ ജീവനക്കാരുടെ കുറവ് വന്നപ്പോൾ താൽക്കാലികമായി നിയമിച്ചവരും സ്ഥിരപ്പെടുത്തുന്നവരുടെ ലിസ്റ്റിലുണ്ട്. കൂട്ടസ്ഥിരപ്പെടുത്തൽ പിഎസ്സി വഴി കയറിയവർക്ക് പ്രൊമോഷൻ ഇല്ലാതാകുന്നതിന് കാരണമാകും.
യൂണിയൻ നേതാക്കളുടെ അപേക്ഷ പ്രകാരമാണ് തീരുമാനം. ഇത്രയേറെ പേരെ ഒന്നിച്ച് സ്ഥിരപ്പെടുത്തുന്നത് അപൂർവ്വമാണ്. ഫയൽ നികുതി വകുപ്പിന്റെ പരിഗണനയിലാണ്. ഉത്തരവ് ഉടൻ ഇറങ്ങിയേക്കുമെന്നാണ് സൂചന.
