നിരവധി ടെലിവിഷൻ പരമ്പരകളിലൂടെയും സിനിമകളിലൂടെയും ശ്രദ്ധേയയായ നടിയാണ് ശാലിൻ സോയ. മലയാളത്തിന് പുറമെ തമിഴ് സിനിമകളിലും ശാലിൻ സാന്നിദ്ധ്യം അറിയിച്ചിരുന്നു. സോഷ്യൽ മീഡിയയിലും ശാലിൻ സജീവമാണ്. തന്റെ യാത്രങ്ങളും മറ്റു വിശേഷങ്ങളും സോഷ്യൽ മീഡിയയിലൂടെ താരം ആരാധകരുമായി പങ്കുവെക്കാറുണ്ട്. അത്തരത്തിൽ താരം പങ്കുവെച്ച ഒരു പോസ്റ്റാണ് ഇപ്പോൾ ശ്രദ്ധേയമാകുന്നത്.
വിഷാദം നേരിടുമ്പോഴോക്കെ തനിക്ക് അത്യാവശ്യമായ ഒന്നാണ് ചോക്ലേറ്റ് എന്നാണ് താരത്തിന്റെ അഭിപ്രായം. അമിതമായി മധുരം കഴിക്കുന്നത് ആരോഗ്യത്തെ ബാധിക്കുമെന്നറിയാമെങ്കിലും തനിക്ക് അതില്ലാതെ പറ്റില്ലെന്നും താരം കുറിച്ചു. ശാലിൻ സോയയുടെ കുറിപ്പിങ്ങനെ…
‘ശരീരഭാരം കുറച്ച് ആരോഗ്യവതിയായി ഇരിക്കാൻ മധുരത്തിന്റെ ഉപയോഗം കുറയ്‌ക്കണമെന്ന് പ്രിയപ്പെട്ടവരെല്ലാം പറയാറുണ്ട്. നമ്മുടെ ഡയറ്റിൽ നിന്ന് മധുരം ഒഴിവാക്കുന്നത് അത്യാവശ്യമായ കാര്യമാണ്. എന്നാൽ അതിനോട് ഞാൻ പൂർണമായും യോജിക്കുന്നില്ല. എന്റെ മനസ്സിന് അത് കിട്ടിയേ മതിയാകൂ. ജീവിതത്തിൽ ഞാൻ അഭിമുഖീകരിക്കേണ്ടി വരുന്ന പ്രശ്‌നങ്ങൾ രമ്യമായി കൈകാര്യം ചെയ്യാൻ തനിക്ക് സാധിക്കാറില്ല. അത്തരം അവസരങ്ങളിൽ എനിക്ക് മധുരം കിട്ടിയേ മതിയാകൂ’.
‘സോഷ്യൽ മീഡിയകളിൽ കാണുന്ന പോസ്റ്റുകളിൽ നമ്മൾ കൂളാണെന്ന് മറ്റുള്ളവർക്ക് തോന്നും. അവയെല്ലാം മറ്റുള്ളവർക്ക് മുന്നിൽ വരുത്തി തീർക്കുന്നതാണ്. അവയൊന്നും യാഥാർത്ഥ്യമല്ല, വിശ്വസിക്കരുത്… ജീവിതം അതിന്റെ പണിയെടുക്കുമ്പോൾ എനിക്ക് കുറച്ചെങ്കിലും സന്തോഷം വേണം. ആ സന്തോഷം എനിക്ക് തരുന്നത് മധുരമാണ്. ഞാൻ വിഷാദം നേരിടുകയോ തളർന്നിരിക്കുകയോ ചെയ്യുമ്പോൾ ചോക്ലേറ്റോ എന്റെ ഫേവറിറ്റ് കേക്കോ എനിക്ക് വേണം’ എന്നായിരുന്നു ശാലിൻ സോയ കുറിക്കുന്നത്.
