ഗാന്ധിനഗർ; ഗുജറാത്തിലെ സോമനാഥ രാമക്ഷേത്രത്തിൽ ദർശനം നടത്തി ബോളിവുഡ് താരം കങ്കണ റണാവത്ത്. ക്ഷേത്രദർശനത്തിന്റെ ചിത്രങ്ങൾ താരം സമൂഹമാദ്ധ്യമങ്ങളിൽ പങ്കുവെച്ചു. വളരെ സന്തോഷകരമായ ദിവസമായിരുന്നുവെന്നും ദർശനത്തിനായി സഹായിച്ച എല്ലാവർക്കും നന്ദി അറിയിക്കുന്നതായും കങ്കണ എക്സിൽ കുറിച്ചു.
കഴിഞ്ഞദിവസം ദ്വാരക സന്ദർശിച്ചതിന്റെ ചിത്രങ്ങളും സമൂഹമാദ്ധ്യമങ്ങളിൽ കങ്കണ പങ്കുവെച്ചിരുന്നു. ‘കുറച്ച് ദിവസങ്ങളായി എന്റെ ഹൃദയം വല്ലാതെ അസ്വസ്ഥമായിരുന്നു. അപ്പോൾ എനിക്ക് ദ്വാരക സന്ദർശിക്കണമന്ന ആഗ്രഹം തോന്നി. ഈ ദ്വാരകയിൽ കാലുകുത്തിയ ഉടനെ എന്റെ ആശങ്കകളും സങ്കടങ്ങളും വിട്ടൊഴിഞ്ഞു. എന്റെ മനസ്സ് ശാന്തമായി. ഇപ്പോഴെനിക്ക് വളരെയധികം സന്തോഷം കൈവന്നിരിക്കുന്നു. ദ്വാരകനാഥനായ ശ്രീകൃഷ്ണന്റെ അനുഗ്രഹം എന്നും എന്റെ കൂടെ ഉണ്ടാകട്ടെയെന്ന് ഞാൻ പ്രാർത്ഥിക്കുന്നു.’-ദ്വാരക സന്ദർശിച്ചതിന്റെ ചിത്രങ്ങൾ പങ്കുവച്ചുകൊണ്ട് കങ്കണ കുറിച്ചു.
അതേസമയം അടുത്തിടെ പുറത്തിറങ്ങിയ തേജസ് എന്ന ചിത്രത്തിലാണ് കങ്കണ റണാവത്ത് അഭിനയിച്ചത്. സർവേഷ് മേവാര സംവിധാനം ചെയ്ത ചിത്രം ഒക്ടോബർ 27ന് തിയേറ്ററുകളിൽ റിലീസ് ചെയ്തു. റോണി സ്ക്രൂവാലയാണ് ‘തേജസ്’ നിർമ്മിച്ചത്. കങ്കണയെ കൂടാതെ അൻഷുൽ ചൗഹാൻ, വരുൺ മിത്ര, ആശിഷ് വിദ്യാർത്ഥി, വിശാഖ് നായർ, കശ്യപ് ശങ്കരി, സുനിത് ടണ്ടൻ, റിയോ കപാഡിയ, മോഹൻ അഗാഷെ, മുഷ്താഖ് കാക്ക് എന്നിവരും അഭിനയിച്ചിരുന്നു.
