ധാക്ക: ബംഗ്ലാദേശി നടി ഹുമൈറ ഹിമു അന്തരിച്ചു. 37 വയസായിരുന്നു. അബോധാവസ്ഥയിൽ കണ്ടെത്തിയ നടിയെ ഉടൻ തന്നെ ധാക്കയിലെ ഉത്തര ആധുനിക് മെഡിക്കൽ കോളേജ് ആശുപത്രിയിൽ എത്തിച്ചിരുന്നെങ്കിലും മരിച്ചിരുന്നതായി ഡോക്ടർമാർ അറിയിച്ചു.
നടിയുടെ കഴുത്തിൽ സംശയാസ്പദമായ പാടുകൾ ഉണ്ടായിരുന്നുവെന്നാണ് ആശുപത്രി അധികൃതർ അറിയിക്കുന്നത്. കെട്ടിയിട്ടിരുന്നതായി തോന്നിപ്പിക്കുന്നതാണ് പാടുകളെന്നും ഡോക്ടർമാർ പറയുന്നു. ബോധരഹിതയായ ഹുമൈറയെ സുഹൃത്തായിരുന്നു ആശുപത്രിയിൽ എത്തിച്ചത്. എന്നാൽ പോലീസ് എത്തുന്നതിന് മുമ്പ് തന്നെ ഇയാൾ ആശുപത്രിയിൽ നിന്നും മുങ്ങിയിരുന്നു. ഒളിവിൽ പോയ സുഹൃത്തിനായി പോലീസ് തിരച്ചിൽ ആരംഭിച്ചു.
തീയേറ്റർ പ്രകടനങ്ങളിലൂടെ 2006ൽ കരിയർ ആരംഭിച്ച ഹുമൈറ ഹിമു പിന്നീട് ടെലിവിഷൻ താരമായി മാറുകയായിരുന്നു. ചായാബിതി ആണ് നടിയുടെ പ്രശസ്ത പരമ്പര. ബരി ബരി സാരി സാരി, ഹൗസ്ഫുൾ, ഗുൽഷൻ അവന്യൂ എന്നിവയാണ് മറ്റ് പരമ്പരകൾ.
