ഉറങ്ങാതിരുന്നാൽ പലപ്പോഴും ക്ഷീണവും ഉന്മേഷക്കുറവുമൊക്കെ അനുഭവപ്പെടും. എന്നാൽ ഇടയ്ക്കിടെ ഉറങ്ങാതിരുന്നാൽ മാനസിക നില മെച്ചപ്പെടുമെന്നാണ് പുതിയ പഠനം പറയുന്നത്. നോർത്ത് വെസ്റ്റേൺ സർവകലാശാലയിലെ ഗവേഷകർ നടത്തിയ പഠനത്തിലാണ് ഇക്കാര്യം വ്യക്തമാക്കുന്നത്. മാനസികാവസ്ഥകൾ സ്വാഭാവികമായി എങ്ങനെ മാറുന്നുവെന്നുള്ള പുതിയ കാഴ്ചപ്പാടാണ് പുതിയ പഠനത്തിലൂടെ പുറത്തുവരുന്നത്.
ഉറക്കക്കുറവ് ഹാപ്പി ഹോർമോമായ ഡോപാമൈനിന്റെ അളവ് വർദ്ധിപ്പിക്കുന്നു. ഇതുവഴി തലച്ചോറിനെ ദിവസങ്ങളോളം ഉല്ലാസാവസ്ഥ നിലനിർത്താൻ സഹായിക്കുന്നു. എലികളുടെ സ്വഭാവ രീതികളും മസ്തിഷ്ക പ്രവർത്തനങ്ങളും പഠിച്ചാണ് ഗവേഷകർ ഈ നിരീക്ഷണത്തിലെത്തി ചേർന്നത്. നിരന്തരം ഉറങ്ങാതിരിക്കുന്നത് നിരവധി ആരോഗ്യപ്രശ്നങ്ങൾ സൃഷ്ടിക്കുമെന്നത് തെളിയിക്കപ്പെട്ടിട്ടുണ്ട്. എന്നാൽ ഇടയ്ക്കിടെയുള്ള ഉറക്കക്കുറവ് തലച്ചോറിന് നല്ലതാണെന്നാണ് പറയുന്നത്.
മിതമായ ഉറക്കമില്ലായ്മ തലച്ചോറിനെ പുനക്രമീകരിക്കുന്നതിന് കാരണമാകുന്നു. ദിവസങ്ങളോളം ഉന്മേഷം പകരാനും വിഷാദം പോലുള്ള അവസ്ഥകളിൽ നിന്ന് കരകയറാനും സഹായിക്കും. ഉറക്കരീതികളിലെ പെട്ടെന്നുള്ള മാറ്റങ്ങളും മാനസികാവസ്ഥയും തമ്മിലുള്ള ബന്ധം ഇതിനോടകം തന്നെ ഗവേഷകർ മനസിലാക്കിയിട്ടുണ്ട്. വിഷാദരോഗത്തിൽ നിന്ന് മുക്തി നേടാൻ മിതമായ ഉറക്കമില്ലായ്മ സഹായിക്കുമെന്ന് കണ്ടെത്തിയെങ്കിലും ഉറക്കം ഒഴിവാക്കുന്നതിന് പകരം വ്യായമം ചെയ്യാനും മറ്റും ശ്രദ്ധിക്കണമെന്നും വിദഗ്ധർ അഭിപ്രായപ്പെടുന്നു.
