മലപ്പുറം: തിരൂരിൽ ഓർഡർ ചെയ്ത ബിരിയാണിയിൽ കോഴിത്തലയെന്ന പരാതിയുമായി അദ്ധ്യാപിക. തിരൂർ ഏഴൂർ പിസി പടിയിലെ കളരിക്കൽ പ്രതിഭയ്ക്കാണ് ബിരിയാണിയിൽ നിന്ന് കോഴിത്തല ലഭിച്ചത്. മുത്തൂരിലെ പൊറോട്ട സ്റ്റാളിൽ നിന്ന് കഴിഞ്ഞ ദിവസം രാത്രിയായിരുന്നു ബിരിയാണി ഓർഡർ ചെയ്തത്.
നാല് ബിരിയാണിയായിരുന്നു ഓർഡർ ചെയ്തത്. ഒരു പാക്കറ്റ് ബിരിയാണി തുറന്ന് നോക്കിയപ്പോഴാണ് കോഴിത്തല കണ്ടത്. രണ്ട് ബിരിയാണി കുട്ടികൾ കഴിച്ച് കഴിഞ്ഞതിന് ശേഷം മൂന്നാമാത്തെ പാഴ്സൽ പൊട്ടിച്ചപ്പോഴാണ് കോഴിത്തല കണ്ടത്.
തിരൂർ നഗരസഭ ആരോഗ്യ വിഭാഗത്തിനും ഫുഡ് സേഫ്റ്റി ഓഫീസർക്കും പ്രതിഭ പരാതി നൽകിയിട്ടുണ്ട്. പരപ്പേരി സ്വാശ്രയ കോളേജിലെ അദ്ധ്യാപികയാണ് പ്രതിഭ.
