മോഹൻലാലിന് ബെംഗളൂരുവിൽ വൻ സ്വീകരണമൊരുക്കി ആരാധകർ. ഒരു ജ്വല്ലറി ഉദ്ഘാടന ചടങ്ങിന്റെ ഭാഗമായാണ് മോഹൻലാൽ ബെംഗളൂരുവിലെത്തിയത്. താരത്തെ കാണാൻ ആരാധകപ്രളയം തന്നെ ജ്വല്ലറിയുടെ ചുറ്റിലുമുണ്ടായിരുന്നു. ആരാധകരെ ആവേശത്തിലാക്കിയ മോഹൻലാലിന്റെ വരവ് കാണിക്കുന്ന വീഡിയോകളും ദൃശ്യങ്ങളും ഇതിനോടകം സാമൂഹ്യമാദ്ധ്യമങ്ങളിൽ പ്രചരിക്കുന്നുണ്ട്.
മോഹൻലാലിനെ ഒന്ന് കാണണമെന്ന് ആവശ്യപ്പെട്ട് ഒരാൾ മോഹൻലാൽ സഞ്ചരിച്ചിരുന്ന കാറിന് മുന്നിൽ കിടക്കുന്ന വീഡിയോയും സാമൂഹ്യമാദ്ധ്യമങ്ങളിൽ ശ്രദ്ധേയമാകുകയാണ്. പോലീസും മറ്റുള്ളവരും ചേർന്നാണ് ഇയാളെ കാറിന് മുന്നിൽ നിന്നും മാറ്റിയത്. ആരാധകരുടെ ആവേശം പോലീസിനും ഇരട്ടി പ്രയാസമുണ്ടാക്കിയിരുന്നു. രാജ്യമെമ്പാടും ആരാധകവൃന്ദമുള്ള താരത്തിന്റെ ചിത്രങ്ങൾ ആരാധകർ ഇരുകൈയും നീട്ടിയാണ് സ്വീകരിക്കുന്നത്. മലയാളത്തിന് പുറമേ മറ്റ് പലഭാഷകളിലും ശ്രദ്ധേയ വേഷങ്ങളിലാണ് മോഹൻലാൽ എത്തുന്നത്.
ജീത്തു ജോസഫിന്റെ സംവിധാനത്തിലൊരുങ്ങുന്ന നേര്,റാം എന്നീ ചിത്രങ്ങൾ, ലിജോ ജോസ് പെല്ലിശ്ശേരി ചിത്രം മലൈക്കോട്ടൈ വാലിബൻ, പൃഥ്വിരാജ് സുകുമാരന്റെ എമ്പുരാൻ, ജോഷിയുടെ റമ്പാൻ, മോഹൻലാൽ ആദ്യമായി സംവിധാനം ചെയ്യുന്ന ബറോസ് എന്നിവയാണ് ആരാധകർ ആകാംക്ഷയോടെ കാത്തിരിക്കുന്ന താരത്തിന്റെ പുതിയ ചിത്രങ്ങൾ. പുതിയതായി റിലീസ് ചെയ്യാനിരിക്കുന്ന പാൻ ഇന്ത്യൻ കന്നഡ ചിത്രം ‘വൃഷഭ’, ‘കണ്ണപ്പ’ എന്നിവയിലും മോഹൻലാൽ പ്രധാന വേഷത്തിലെത്തുന്നുണ്ട്.
