3ജിയിൽ ഡൗൺലോഡിംഗിന് വേണ്ടി കാത്തിരിക്കുന്ന ഉപയോക്താക്കൾക്ക് സന്തോഷവാർത്തയുമായി ബിഎസ്എൻഎൽ. സിം അപ്ഗ്രേഡ് ചെയ്യുകയാണ് എങ്കിൽ സൗജന്യ ഇന്റർനെറ്റ് സേവനം നൽകാമെന്ന വാഗ്ദാനമാണ് ബിഎസ്എൻഎൽ പങ്കുവെച്ചിരിക്കുന്നത്. പഴയ 3ജി അല്ലെങ്കിൽ 2ജി സിം ബിഎസ്എൻഎൽ ഓഫീസിൽ എത്തിച്ച് 4ജിയിലേക്ക് മാറ്റാനാകും. ഇതിലൂടെ സൗജന്യമായി 4ജിബി ഡാറ്റ ആസ്വദിക്കാനാകുമെന്നും ഭാരത് സഞ്ചാർ നിഗം ലിമിറ്റഡിന്റെ ആന്ധ്രാപ്രദേശിലെ യൂണിറ്റ് എക്സിലൂടെ അറിയിച്ചു. മൂന്ന് മാസത്തേക്കാണ് ഈ പ്ലാൻ ലഭ്യമാകുക.
ആദ്യ ഘട്ടത്തിൽ കേരളത്തിലെ ഉപയോക്താക്കൾക്ക് ലഭ്യമാകുമോ എന്നത് സംബന്ധിച്ച് കൃത്യമായ വിവരങ്ങൾ പുറത്തുവന്നിട്ടില്ല. നിലവിൽ ആന്ധ്രാപ്രദേശ് ബിസിഎൻഎൽ യൂണിറ്റാണ് ഈ അറിയിപ്പ് പങ്കുവെച്ചിരിക്കുന്നത്. 4ജി സിമ്മിലേക്ക് അപ്ഗ്രേഡ് ചെയ്യുന്നതോടെ ഉപയോക്താക്കൾക്ക് സേവനം മികച്ച രീതിയിൽ ആസ്വദിക്കാനാകും. 4ജി സിമ്മിലേക്ക് അപ്ഗ്രേഡ് ചെയ്യുന്നതിനായി ഉപയോക്താക്കൾക്ക് അവരുടെ കസ്റ്റമർ സർവീസ് സെന്റർ, ഫ്രാഞ്ചൈസി, റീട്ടെയിലർ എന്നിവിടങ്ങളിലെത്തി മാറ്റാവുന്നതാണ്.
ഇന്ത്യൻ മൊബൈൽ കോൺഗ്രസ് 2023 ഡിസംബറിൽ 4ജി സേവനങ്ങളിൽ ആരംഭിക്കുമെന്നും 2024 ജൂണിലെത്തുമ്പോഴേക്കും രാജ്യത്തുടനീളം ലഭ്യമാക്കുമെന്നും ബിഎസ്എൻഎൽ ചെയർമാൻ പ്രവീൺകുമാർ പുർവാർ പറഞ്ഞു. 5ജി നെറ്റ്വർക്കിലേക്ക് ജൂണിന് ശേഷം കടക്കുമെന്നും ചെയർമാൻ വ്യക്തമാക്കി.