ഇടുക്കി: ഭാര്യാപിതാവിനെ മരുമകൻ വെട്ടിക്കൊലപ്പെടുത്തി. നെടുങ്കണ്ടം കൗന്തി സ്വദേശി ടോമിയാണ് കൊല്ലപ്പെട്ടത്. സംഭവത്തിൽ മരുമകൻ ജോബിൻ തോമസിനെ പോലീസ് കസ്റ്റഡിയിലെടുത്തു. മകൾ ടിന്റുവിന് നേരെയുണ്ടായ ആക്രമണം തടയുന്നതിനിടെയായിരുന്നു ടോമിയ്ക്ക് പരിക്കേറ്റത്. ടിന്റുവിനും ആക്രമണത്തിൽ പരിക്കേറ്റിരുന്നു.
ജോബിൻ തന്റെ കത്തികൊണ്ട് ഇരുവരെയും ആക്രമിക്കുകയായിരുന്നു. വെട്ടേറ്റ് ഗുരുതരമായി പരിക്കേറ്റ ടിൻറുവിനെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ടിന്റുവിന്റെ ആരോഗ്യനില ഗുരുതരമായി തുടരുകയാണ്. കുടുംബ കലഹമാണ് കൊലപാതകത്തിൽ കലാശിച്ചതെന്നാണ് പ്രാഥമിക വിവരം. സംഭവത്തിൽ കേസെടുത്ത് പോലീസ് അന്വേഷണം ആരംഭിച്ചു.
ബെംഗളൂരുവിൽ കച്ചവടം നടത്തി വരികയായിരുന്നു ജോബിൻ. ഇയാളും ഭാര്യ ടിന്റുവും ഏറെ നാളായി പിണങ്ങി താമസിക്കുകയായിരുന്നു. ഇന്നലെ അർദ്ധ രാത്രിക്കുശേഷമാണ് നെടുംകണ്ടം കൗന്തിയിലെ ടോമിയുടെ വീട്ടിലെത്തി ജോബിൻ ആക്രമണം നടത്തിയത്.
