പ്രമേഹം മാറി നിൽക്കും; ഈ ഇലകളുടെ ഗുണങ്ങൾ അറിയാതെ പോകരുതേ..

മാറിവരുന്ന ജീവതചര്യകളും മറ്റു കാരണങ്ങൾ കൊണ്ടും പ്രായഭേദ വ്യത്യാസങ്ങളില്ലാതെ ഇന്ന് നമുക്ക് മുന്നിൽ വില്ലനായി നിൽക്കുന്ന ഒരു രോഗമാണ് പ്രമേഹം. മധുരത്തിന്റെ അളവ് കുറയ്‌ക്കുന്നതാണ് പ്രമേഹം നിയന്ത്രിക്കുന്നതിന് ഉത്തമ മാർഗം. എന്നാൽ നമുക്ക് ചുറ്റുമൊന്ന് കണ്ണോടിച്ചാൽ ചില ഔഷധ ഗുണമുള്ള സസ്യങ്ങളെ കാണാം. ഇവയുപയോഗിച്ചും നമുക്ക് പ്രമേഹം നിയന്ത്രിക്കാം. അവയേതൊക്കെയെന്നു നോക്കാം…

മാവില

ഒരു മാവ് പോലുമില്ലാത്ത വീട്ടു പറമ്പുകൾ ചുരുക്കമായിരിക്കും. മാവിന്റെയില പ്രമേഹം നിയന്ത്രിക്കുന്നതിന് ഉത്തമമാണ്. മാവിലയിട്ട തിളപ്പിച്ചാറ്റിയ വെള്ളം കുടിക്കുന്നത് പ്രമേഹത്തെ നിയന്ത്രിക്കാൻ സഹായിക്കുന്നു.

നെല്ലിയില

പല രോഗങ്ങളെ തടയാൻ സഹായിക്കുന്ന ഇലയാണ് നെല്ലിയില. നെല്ലിയില ഇട്ട വെള്ളം കുടിക്കുന്നതും പ്രമേഹത്തെ നിയന്ത്രിച്ച് നിർത്താൻ സഹായിക്കുന്നു.

കറിവേപ്പില

കറികളിലെ നിത്യസാന്നിധ്യമായ കറിവേപ്പിലകളെ നാം എപ്പോഴും വേണ്ട രീതിയിൽ പരിഗണിക്കാറില്ല. അവയെ കഴിക്കാൻ നമ്മിൽ പലർക്കും ഇഷ്ടവുമില്ല. എന്നാൽ പ്രമേഹമുള്ള വ്യക്തിയാണ് നിങ്ങളെങ്കിൽ കറിവേപ്പിലകളെ ഗൗനിക്കാതിരിക്കരുത്. ഇൻസുലിൻ ഹോർമോണുകളുടെ പ്രവർത്തനം ഫലപ്രദമാക്കാൻ സഹായിക്കുന്ന ഇലകളാണിവ. കറിവേപ്പിലകൾ ഭക്ഷണത്തിലുൾപ്പെടുത്തി കഴിക്കുന്നത് പ്രമേഹം നിയന്ത്രിക്കാൻ സഹായിക്കുന്നു.

കൃഷ്ണതുളസി

പഴമക്കാരുള്ള വീടുകളുടെ മുറ്റത്ത് എപ്പോഴും ഒരു കൃഷ്ണ തുളസി ചെടിയുമുണ്ടാകാറുണ്ട്. ഏതൊരു രോഗം വന്നാലും ചികിത്സയിൽ കൃഷ്ണതുളസിയെയും ഉൾപ്പെടുത്തും. പ്രമേഹം ഉള്ളവർക്കും ഉത്തമമാണ് ഈ തുളസി. ഇതിന്റെ ഇലകൾ കടിച്ച് നീരിറക്കുന്നതോ വെള്ളത്തിൽ ഇട്ട് തിളപ്പിച്ച് കുടിക്കുന്നതോ പ്രമേഹം കുറയ്‌ക്കുന്നതിന് സഹായിക്കുന്നു.