മനോഹരമായ ബഹിരാകാശ കാഴ്ചകൾ മിക്കപ്പോഴും നാസ പങ്കുവെയ്ക്കാറുണ്ട്. ഇപ്പോഴിതാ അന്താരാഷ്ട്ര ബഹിരാകാശ നിലയത്തിൽ നിന്നും പകർത്തിയ വിസ്മയിപ്പിക്കുന്ന ദൃശ്യമാണ് ശ്രദ്ധേയമാകുന്നത്. അറോറയുടെ ചിത്രമാണ് നാസ പുറത്തുവിട്ടിരിക്കുന്നത്. അമേരിക്കൻ സംസ്ഥാനമായ യൂട്ടായുടെ മുകളിലൂടെ സഞ്ചരിക്കവെയാണ് ചിത്രം പകർത്തിയത്. ഭൂമിയുടെ ധ്രുവമേഖലയിൽ ഉടനീളം രാത്രി കാലങ്ങളിൽ ദൃശ്യമാകുന്ന പ്രകാശത്തെയാണ് ധ്രുവദീപ്തി അഥവാ അറോറ എന്ന് വിളിക്കുന്നത്.
പച്ച നിറത്തിലാണ് അറോറ ഒഴുകിയത്. ഭൂമിയ്ക്ക് മുകളിലൂടെ ഒരു തിളക്കമുള്ള പ്രഭാവലയമായി ഇത് മാറി. സൂര്യന്റെ ഉപരിതലത്തിലെ സൗര കൊടുങ്കാറ്റുകൾ മൂലമുണ്ടാകുന്ന ഒരു അന്തരീക്ഷ പ്രതിഭാസമാണ് അറോറയെന്ന് നാസ പങ്കുവെച്ച പോസ്റ്റിനൊപ്പം കുറിച്ചിരുന്നു. സൂര്യനിൽ നിന്നും ഉയർന്നു വരുന്ന ചാർജുള്ള കണങ്ങൾ ഭൂമിയുടെ അന്തരീക്ഷത്തിലേക്ക് കടക്കവെയാണ് അറോറ ദൃശ്യമാകുന്നത്.
അന്തരീക്ഷത്തിലേക്ക് കടക്കുന്ന കണങ്ങൾ വാതക തന്മാത്രകളുമായി കൂട്ടിയിടിച്ച് ഫോട്ടോണുകൾ പുറത്തു വിടുന്നു. ഈ വേളയിലാണ് ആകാശത്ത് വർണ വിസ്മയം തെളിയുന്നത്. സാധാരണയായി പച്ച, ചുവപ്പ് എന്നീ നിറങ്ങളിലാണ് ഇത് കാണപ്പെടുന്നത്.