പ്രതീക്ഷയുടെ പൊൻ കിരണം; ലോകത്ത് ആദ്യമായി പൂർണമായി കണ്ണ് മാറ്റിവച്ചു; വൈദ്യശാസ്ത്രത്തിലെ പുത്തൻ നാഴികകല്ല്

കണ്ണിന്റെ അനുബന്ധ ഘടനകളിൽ നടത്തുന്ന ശസ്ത്രക്രിയകളെയാണ് വൈദ്യശാസ്ത്ര ലോകം ‘നേത്ര ശസ്ത്രക്രിയ’ എന്ന് പറയുന്നത്. വളരെ ​ദുർബലമായ അവയവമാണ് കണ്ണ്. അതുകൊണ്ട് തന്നെ ശസ്ത്രക്രിയക്ക് മുൻപും പിൻപും അതീവ പരിചരണം ആവശ്യമാണ്. ലേസർ ശസ്ത്രക്രിയ, തിമിര ശസ്ത്രക്രിയ, ​ഗ്ലോക്കോമ ശസ്ത്രക്രിയ. റിഫ്രാക്റ്റീവ് ശസ്ത്രക്രിയ, കോർണിയ ശസ്ത്രക്രിയ, വിട്രിയോറെറ്റിനൽ ശസ്ത്രക്രിയ തുടങ്ങയ ശസ്ത്രക്രിയകൾ നമുക്ക് സുപരിചിതമാണ്. കണ്ണിനുള്ളിലെ വിവിധ ഭാ​ഗങ്ങളിലാണ് ഈ ശസ്ത്രക്രിയകൾ നടത്തുന്നത്.

എന്നാൽ ലോകത്ത് ആദ്യമായി കണ്ണ് പൂർണമായി മാറ്റി വെച്ചിരിക്കുന്ന ശസ്ത്രക്രിയ (Whole Eye Transplant) നടത്തിയിരിക്കുകയാണ് അമേരിക്കൻ ഡോക്ടർമാർ. ദാതാവിന്റെ മുഖത്തിന്റെ ഭാ​ഗവും ഇടതുകണ്ണ് മുഴുവനായും നീക്കം ചെയ്ത് സ്വീകർത്താവിൽ വെച്ച് പിടിപ്പിക്കുന്നതായിരുന്നു ശസ്ത്രക്രിയ. വൈദ്യുതാഘാതത്തെ അതിജീവിച്ച 46-കാരനായ ആരോൺ ജെയിംസിനാണ് ശസ്ത്രക്രിയ നടത്തിയത്. അമേരിക്കയിലെ NYU ലാങ്കോൺ ഹെൽത്ത് സെൻ്ററാണ് നേട്ടം കൈവരിച്ചത്.

ലൈൻമാൻ ആയി ജോലി ചെയ്തിരുന്ന ആളായിരുന്നു ആരോൺ. 2021 ജൂണിൽ ജോലി ചെയ്യുന്നതിനിടെ വൈദ്യുത ലൈനിൽ തട്ടി തെറിച്ച് വീണ ആരോണിന്റെ ഇടത് കണ്ണ് പൂർണമായി നഷ്ടപ്പെട്ടു. ഇടത് കൈമുട്ട്, മൂക്ക്, ചുണ്ട്, മുൻ പല്ലുകൾ, കവിൾ ഭാ​ഗവും കീഴ് താടിയിലെ അസ്ഥി എന്നിവയ്‌ക്കും ​ഗുരുതരമായി പരിക്കേറ്റിരുന്നു. ജീവിതത്തെയും മണത്തെയും മുഖാമുഖം നേരിട്ട് ആരോൺ മാസങ്ങളോളം ആശുപത്രിയിൽ കഴിഞ്ഞു.

എന്നാൽ കണ്ണ് പൂർണമായും നഷ്ടപ്പെട്ടതിനാൽ ഡോക്ടർമാരും ആശയക്കുഴപ്പത്തിലായി. എലികളിൽ മാത്രം പരീക്ഷിച്ചിട്ടുള്ള കണ്ണ് മാറ്റിവെക്കൽ ശസ്ത്രക്രിയ ആദ്യമായി ആരോണിൽ നടത്താൻ തീരുമാനിക്കുകയായിരുന്നു. എലികളിൽ നടത്തിയ പരീക്ഷണത്തിൽ അവയ്‌ക്ക് ഭാ​ഗികമായി കാഴ്ചശക്തി ലഭിച്ചിരുന്നു. മനുഷ്യനിൽ എത്രമാത്രം ഫലപ്രദമാകുമെന്ന് ഇനിയും അറിയില്ല.

ആരോ​ഗ്യരം​ഗത്തെ ബൃ​ഹത്തായ നേട്ടമാണ് കൈവരിച്ചതെന്ന് ശസ്ത്രക്രിയ നടത്തിയ പ്രമുഖ മെഡിക്കൽ സെന്ററായ NYU ലാങ്കോൺ ഹെൽത്ത് വ്യക്തമാക്കി. 21 മണിക്കൂർ നീണ്ട ശസ്ത്രക്രിയയാണ് വിജയകരമായി പൂർത്തീകരിച്ചതെന്ന് ശസ്ത്രക്രിയയ്‌ക്ക് നേതൃത്വം നൽകിയ എഡ്വാർഡോ റോഡ്രിഗസ് പറഞ്ഞു.

മാറ്റിവെച്ച ഇടതുകണ്ണിലെ റെറ്റിനയിൽ രക്തപ്രവാഹം നടക്കുന്നുണ്ടെന്നും ആരോ​ഗ്യം വീണ്ടെടുക്കുന്നതിന്റെ ലക്ഷണങ്ങൾ പ്രകടിപ്പിക്കുന്നുണ്ടെന്നും ഡോക്ടർമാർ പറ‍ഞ്ഞു. എന്നാൽ തലച്ചോറിലേക്കുള്ള പ്രവർത്തനങ്ങൾ എപ്രകാരമായിരിക്കുമെന്ന് കൃത്യമായി പറയാൻ കഴിയില്ലെന്നും കാഴ്ച ലഭിക്കാൻ പകുതി സാധ്യത മാത്രമാണ് ഉള്ളതെന്നും അദ്ദേഹം കൂട്ടിച്ചേർത്തു. കാഴ്ചശക്തി തിരിച്ച് ലഭിച്ചാൽ ആരോ​ഗ്യരം​ഗത്തെ വൻ നേട്ടത്തിനാകും ലോകം സാക്ഷ്യം വഹിക്കുക.