ഓസ്ട്രേലിയയിൽ നിന്ന് വേർപിരിഞ്ഞ് അപ്രത്യക്ഷമായ ഭൂഖണ്ഡത്തെ 155 ദശലക്ഷം വർഷങ്ങൾക്ക് ശേഷം കണ്ടെത്തി. ആർഗോലാൻഡ് എന്ന് വിളിക്കുന്ന ഭൂപ്രദേശമാണ് നെതർലാൻഡിലെ ഉട്രെക്റ്റ് സർവകലാശാലയിലെ ഗവേഷകർ കണ്ടെത്തിയത്. തെക്കുകിഴക്കൻ ഏഷ്യയിലെ കിഴക്കൻ ദ്വീപുകൾക്ക് അടിയിലാണ് ഓസ്ട്രേലിയയിൽ നിന്ന് വേർപിരിഞ്ഞ പ്രദേശത്തെ കണ്ടെത്തിയത്.
ദശലക്ഷക്കണക്കിന് വർഷങ്ങൾക്ക് മുൻപ് ഓസ്ട്രേലിയയിൽ നിന്ന് വലിയൊരു ഭൂപ്രദേശം പിളർന്ന് കാണാതായിരുന്നു. ഈ പ്രദേശത്തെ ആർഗോലാൻഡ് എന്നാണ് വിളിക്കുന്നത്. പ്രദേശത്തെ സംബന്ധിച്ച് നിരവധി പഠനങ്ങൾ നടക്കുന്നതിനിടെയിലാണ് പുതിയ കണ്ടെത്തൽ. തകർന്ന ഭൂഖണ്ഡത്തെ കണ്ടെത്തുന്നതിനായി ഗവേഷകരുടെ സംഘം ആദ്യം ഓസ്ട്രേലിയയുടെ വടക്കൻ പ്രദേശങ്ങളിൽ ഗവേഷണം ആരംഭിച്ചു. തുടർന്ന് ഇന്തോനേഷ്യയ്ക്കും മ്യാൻമറിനും ചുറ്റും ചിതറിക്കിടക്കുന്ന പുരാതന ഭൂമിയുടെ ശകലങ്ങൾ കണ്ടെത്തി. എന്നാൽ ഇവ ആർഗോലാൻഡുമായി ബന്ധമില്ലെന്ന് പിന്നീട് കണ്ടെത്തി.
പിന്നീട് തെക്കുകിഴക്കൻ ഏഷ്യയിൽ നിന്ന് കണ്ടെത്തിയ ചിതറി കിടക്കുന്ന ഭൂമിയുടെ ശകലങ്ങൾ കേന്ദ്രീകരിച്ച് നടത്തിയ പഠനത്തിലാണ് 200 ദശലക്ഷങ്ങളോളം വർഷങ്ങൾക്ക് മുൻപുള്ള ചെറിയ സമുദ്രത്തിന്റെ അവശിഷ്ടങ്ങൾ കണ്ടെത്തിയത്. തെക്ക് കിഴക്കൻ ഏഷ്യയിലുടനീളം ഈ ഭൂഖണ്ഡം ചിതറി കിടക്കുന്നതായി ഗവേഷകർ കണ്ടെത്തി.
ഭൂവൽക്കത്തിലുണ്ടാകുന്ന ചലനങ്ങളും ശക്തിയും കാരണമാണ് (Tectonic force) പ്രദേശം ചിന്നിചിതറിയതെന്നാണ് പഠനത്തിന് നേതൃത്വം നൽകിയ ഗവേഷക സംഘം പറയുന്നത്. ഈ സിദ്ധാന്ത പ്രകാരം ആർഗോലാൻഡ് യഥാർത്ഥ്യത്തിൽ അപ്രത്യക്ഷമായിട്ടില്ല. ഇന്തോനേഷ്യയുടെ കിഴക്കുള്ള ദ്വീപുകൾക്കിടയിൽ വിഘടിച്ച് വ്യാപിച്ച് കിടക്കുന്നു.
ഈ ഭൂപ്രദേശത്തിന്റെ സ്വാധീനം മൂലമാണ് ഇന്തോനേഷ്യൻ കടലിലെ ചൂട് കുറഞ്ഞത് എന്ന വിലയിരുത്തലലിലാണ് ശാസ്ത്രലോകം. പലയിടത്ത് നിന്ന് ലഭിച്ച ഭൂഖണ്ഡത്തിന്റെ ഭാഗങ്ങളിൽ നിന്ന് ലഭിക്കുന്ന വിവരങ്ങൾ പ്രദേശത്തിന്റെ മുൻകാല കാലാവസ്ഥയിലേക്ക് വെളിച്ചം വീശുമെന്നാണ് ഗവേഷകരുടെ പ്രതീക്ഷ.
