ഡെറാഡൂൺ: രാജ്യത്ത് ആദ്യമായി യൂണിഫോം സിവിൽ കോഡ് നടപ്പിലാക്കുന്ന സംസ്ഥാനമാകാൻ ഒരുങ്ങി ഉത്തരാഖണ്ഡ്. രഞ്ചന ദേശായി കമ്മറ്റി ഇതുമായി സംബന്ധിച്ച കരട് രേഖ സർക്കാരിന് അടുത്താഴ്ച കൈമാറും. നിയമത്തിനായുള്ള കരട് പൂർത്തിയാക്കിയ വിവരം അഭിമാനത്തോടെ അറിയിക്കുന്നുവെന്ന് ജസ്റ്റിസ് ദേശായി അറിയിച്ചു.
ദീപാവലിക്കുശേഷം ഉത്തരാഖണ്ഡ് നിയമസഭ പ്രത്യേക സമ്മേളനം വിളിച്ചു ചേർത്ത് ബില്ലിന് അംഗീകാരം നൽകുമെന്നാണ് റിപ്പോർട്ട്. ബിൽ പാസാകുന്നതോടെ യുസിസി നടപ്പിലാക്കുന്ന ആദ്യ സംസ്ഥാനമായി ദേവഭൂമി മാറും. ഉത്തരാഖണ്ഡിന്റെ പാത പിന്തുടർന്ന് യുസിസി നടപ്പിലാക്കാനൊരുങ്ങുകയാണ് ഗുജറാത്ത്. 2024 ലോക്സഭ തിരഞ്ഞെടുപ്പിന് മുന്നോടിയായി ഏകീകൃത സിവിൽ കോഡ് നടപ്പിലാക്കുമെന്നാണ് ഗുജറാത്തും പ്രഖ്യാപിച്ചിരിക്കുന്നത്. ലിംഗസമത്വം ഉറപ്പുവരുത്തുന്നതിനും സ്വത്തുക്കളിൽ പെൺമക്കൾക്ക് തുല്യാവകാശം ലഭിക്കുന്നതിനും ഊന്നൽ നൽകുന്നതാണ് യുസിസി.
