ചെറിയൊരു ഇടവേളയ്ക്ക് ശേഷം എത്തിയ സൽമാൻഖാൻ ചിത്രം ടൈഗർ 3-ക്ക് വൻ വരവേൽപ്പാണ് പ്രേക്ഷകർ നൽകിയിരിക്കുന്നത്. എന്നാൽ ചിത്രം തീയേറ്റിൽ റിലീസ് ചെയ്തതോടെ ആരാധകരുടെ ആഹ്ലാദപ്രകടനങ്ങൾ അതിരു കടന്നു. ആവേശത്തിൽ ആരാധകർ തിയേറ്ററിനുള്ളിൽ പടക്കം പൊട്ടിച്ചതോടെ ഭയന്നു വിറച്ച് ഓടിയിരിക്കുകയാണ് കാണികൾ. സംഭവത്തിന്റെ വീഡിയോ സമൂഹമാദ്ധ്യമങ്ങളിൽ ഇപ്പോൾ വൈറലായിമാറിയിരിക്കുകയാണ്.
മാസ് ലുക്കിൽ തങ്ങളുടെ പ്രിയപ്പെട്ട താരത്തെ കണ്ടതോടെ മാലേഗാവിലെ ആരാധകർ തിയേറ്ററിനകത്ത് പടക്കവും പൂത്തിരിയും കത്തിക്കുകയായിരുന്നു. നാസിക്കിലെ മോഹൻ തിയേറ്ററിലെ ആരാധകരും സകല നിയന്ത്രണംവിട്ടുള്ള തരത്തിലായിരുന്നു ആഘോഷം. പടക്കം പൊട്ടിത്തെറിക്കുന്നതിൽ നിന്ന് രക്ഷപ്പെടാൻ ആളുകൾ ശ്രമിക്കുന്നതും സമൂഹമാദ്ധ്യമത്തിൽ വൈറലായ വീഡിയോയിൽ കാണാവുന്നതാണ്. സംഭവത്തിൽ ആളപായമൊന്നും ഉണ്ടായിട്ടില്ല.
യഷ് രാജ് ഫിലിംസിന്റെ സ്പെെ യൂണിവേഴ്സിന്റെ ഭാഗമായ ചിത്രത്തിൽ വൻ താര നിരയാണ് അണിനിരന്നിരിക്കുന്നത്. കത്രീന കൈഫ് ആണ് നായിക. ചിത്രത്തിലെ വമ്പൻ സംഘട്ടനരംഗത്ത് അതിഥി വേഷത്തിൽ ഷാരൂഖ് ഖാനും എത്തുന്നുണ്ട്. ഇമ്രാൻ ഹാഷ്മിയാണ് വില്ലൻ വേഷത്തിൽ എത്തുന്നത്. രേവതിയും ടൈഗർ 3-യിൽ പ്രധാനവേഷത്തിലുണ്ട്. ടൈഗർ ചിത്രങ്ങളുടെ ശ്രേണിയിലെ മൂന്നാമത്തേതും യഷ് രാജ് സ്പൈ യൂണിവേഴ്സിലെ അഞ്ചാമത്തേയും ചിത്രമാണ് ടൈഗർ 3. മനീഷ് ശർമയാണ് ചിത്രം സംവിധാനം ചെയ്യുന്നത്. ശ്രീധർ രാഘവന്റേതാണ് തിരക്കഥ. അങ്കുർ ചൗധരിയുടേതാണ് സംഭാഷണങ്ങൾ. പ്രീതം സംഗീത സംവിധാനവും അനയ് ഓം ഗോസ്വാമി ഛായാഗ്രഹണവും നിർവഹിക്കുന്നു. യഷ് രാജ് ഫിലിംസിന്റെ ബാനറിൽ ആദിത്യ ചോപ്രയാണ് ടൈഗർ 3യുടെ നിർമ്മാണം.
