ആരാധകരുടെ പ്രിയപ്പെട്ട താരദമ്പതികളാണ് ആലിയ ഭട്ടും രൺബീർ കപൂറും. ഇരുവരും സോഷ്യൽ മീഡിയയിൽ സജീവമാണെങ്കിലും ഇതുവരെയും മകൾ രാഹയുടെ ചിത്രങ്ങൾ സോഷ്യൽ മീഡിയയിൽ പങ്കുവെച്ചിട്ടില്ല. മകൾക്കൊപ്പം താരങ്ങൾ അധികം പൊതു വേദികളിലൊന്നും പ്രത്യക്ഷപ്പെടാറില്ല എന്നതും ശ്രദ്ധേയമാണ്. 6 ന് ആയിരുന്നു രാഹയുടെ ഒന്നാം ജന്മദിനം. എന്നാൽ ജന്മദിനത്തിന്റെ ചിത്രങ്ങളൊന്നും താരങ്ങൾ പങ്കുവെച്ചിരുന്നില്ല. മകളുടെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവെക്കാത്തതിന്റെ കാരണം വ്യക്തമാക്കിയിരിക്കുകയാണ് ആലിയ ഭട്ട്.
‘അവൾക്ക് ഒരു വയസ്മാത്രമാണ് ആയിട്ടുള്ളത്. അവളെ ഒരു ഇൻസ്റ്റഗ്രാം കണ്ടന്റ് ആക്കാൻ ഞങ്ങൾ ആഗ്രഹിക്കുന്നില്ല’. എന്നായിരുന്നു താരത്തിന്റെ മറുപടി. ഇപ്പോൾ താരദമ്പതികൾക്കൊപ്പം രാഹ ഉണ്ടെങ്കിൽ പാപ്പരാസികൾ ചിത്രങ്ങളെടുക്കാറില്ലെന്നും അത്തരം സംഭവങ്ങൾ ഉണ്ടായാൽ വിലക്കുമെന്നും താരം പറയുന്നു. എന്നാൽ ഒരു പൊതുവേദിയിൽ മകൾക്കൊപ്പം എത്തിയപ്പോൾ ആരോ ചിത്രം പകർത്തി സോഷ്യൽ മീഡിയയിൽ പ്രചരിപ്പിച്ചിരുന്നു. ആ സംഭവം വളരെ വിഷമമുണ്ടാക്കിയെന്നും ആലിയ പറഞ്ഞു.
അതേസമയം രൺബീർ നായകനാകുന്ന വമ്പൻ ചിത്രം അനിമൽ റിലീസിനൊരുങ്ങുകയാണ്. ചിത്രം റിലീസായി കഴിഞ്ഞാൽ ആറ് മാസത്തേയ്‌ക്ക് സിനിമയിൽ നിന്ന് ഇടവേളയെടുക്കുകയാണെന്നും താരം നേരത്തെ അറിയിച്ചിരുന്നു. മകൾ ജനിച്ചതിന് ശേഷം അവൾക്കൊപ്പം സമയം കണ്ടെത്താൻ കഴിഞ്ഞിട്ടില്ല. അതുകൊണ്ട് തന്നെ ഈ ആറ് മാസക്കാലം മകൾക്കൊപ്പം തന്നെ ആയിരിക്കുമെന്നും താരം പറഞ്ഞു.
തനിക്കൊരു പിതൃത്വ അവധി എടുക്കാൻ ആഗ്രഹമുണ്ടെന്നും അദ്ദേഹം പറഞ്ഞു. രാഹ ഇപ്പോൾ എല്ലാവരെയും തിരിച്ചറിയാൻ തുടങ്ങിയിരിക്കുന്നു. എന്നെ പ, എന്നും ആലിയയെ മാ, എന്നും വിളിക്കാൻ തുടങ്ങിയിരിക്കുന്നു. അവൾക്കൊപ്പമുള്ള മനോഹരമായ സമയമാണ് ഞാൻ ഇപ്പോൾ സ്വന്തമാക്കാൻ ആഗ്രഹിക്കുന്നത്. അത് ഞാൻ ഈ ഇടവേളയിലൂടെ സ്വന്തമാക്കാൻ പോവുകയാണെന്നുമായിരുന്നു രൺബീറിന്റെ വാക്കുകൾ
