കുബേരൻ എന്ന ചിത്രത്തിൽ ബാലതാരാമായി എത്തി മലയാളികൾക്ക് സുപരിചിതയായ നടിയാണ് കീർത്തി സുരേഷ്. മലയാള സിനിമയിലെ പ്രിയതാരം മേനകയുടെ മകൾ എന്നതിലുപരി സിനിമാ രംഗത്ത് തന്റേതായ ഒരിടം നേടാൻ കീർത്തിയ്ക്ക് സാധിച്ചിട്ടുണ്ട്. ഗീതാഞ്ജലി എന്ന ചിത്രത്തിലൂടെയാണ് കീർത്തി സുരേഷ് മലയാള സിനിമയിൽ സജീവമാകാൻ തുടങ്ങിയത്. മലയാളത്തിൽ നിന്ന് തമിഴിലേക്കും തുടർന്ന് മറ്റ് ഭാഷകളിലേക്കും പോയി ആരാധകരെ സ്വന്തമാക്കാൻ കീർത്തിയ്ക്ക് കഴിഞ്ഞിട്ടുണ്ട്.
സമൂഹമാദ്ധ്യമത്തിൽ നിറസാന്നിധ്യമായ കീർത്തിയുടെ ചിത്രങ്ങൾക്കും വിശേഷങ്ങൾക്കും വലിയ ആരാധകശ്രദ്ധ ലഭിക്കാറുണ്ട്. ഇന്നിതാ താരത്തിന്റെ മറ്റൊരു വിശേഷം സമൂഹമാദ്ധ്യമത്തിൽ പങ്കുവെക്കുകയാണ് കീർത്തി സുരേഷ്. സിനിമാ രംഗത്ത് ചുവടുറപ്പിച്ചിട്ട് പത്ത് വർഷമായി എന്നതാണ് കീർത്തി സുരേഷിന്റെ പുതിയ വിശേഷം. ഫേസ്ബുക്കിൽ പോസ്റ്റ് ചെയ്ത ഒരു വീഡിയോയിലൂടെയാണ് താരം ഇക്കാര്യം പങ്കുവെക്കുന്നത്. അതോടൊപ്പം തന്നെ സിനിമയിലേക്ക് കൈപിടിച്ച് കയറ്റിയ കുടുംബത്തോടും സംവിധായകന്മാരോട് കീർത്തി വീഡിയോയിലൂടെ നന്ദി പറഞ്ഞു.
‘സിനിമാ ലോകത്ത് ഞാൻ ചുവടുറച്ചിട്ട് പത്ത് വർഷം പൂർത്തിയാകുകയാണ്. എന്റെ ജീവിതത്തിൽ വളരെയധികം സന്തോഷം നിറഞ്ഞ നിമിഷമാണിത്. അച്ഛനും അമ്മയുമില്ലാതിരുന്നെങ്കിൽ ഞാൻ എവിടെയും എത്തില്ലായിരുന്നു. പ്രിയൻ അങ്കിളാണ് എന്റെ ഗുരു. അദ്ദേഹത്തോട് എന്നെന്നും കടപ്പാടുണ്ട്. സിനിനാ ലോകത്ത് തുടക്കം കുറിച്ച് തന്നത് പ്രിയൻ അങ്കിളാണ്. എല്ലാ സംവിധായകന്മാരോടും എല്ലാ നിർമ്മാതാക്കളോടും നന്ദി പറയുന്നു.
എന്നെ സപ്പോർട്ട് ചെയ്ത എല്ലാ സമൂഹമാദ്ധ്യമങ്ങൾക്കും എന്റെ പ്രിയപ്പെട്ട പ്രേക്ഷകർക്കും നന്ദി. ഇനിയും ഒരുപാട് ദൂരം സഞ്ചരിക്കണം. അതിന് എല്ലാവരുടെ പിന്തുണയും പ്രാർത്ഥനയും എന്നോടൊപ്പം വേണം. നന്ദി ഒരുപാട് നന്ദി. കീർത്തി സുരേഷ് വീഡിയോയിൽ പറഞ്ഞു.