തിരുവനന്തപുരം: വ്യാജ ഐഡി വിഷയത്തിൽ കോൺഗ്രസിനെതിരെ വിമർശനവുമായി യുവമോർച്ച. രാജ്യത്തെ പൊതുതിരഞ്ഞെടുപ്പ് അട്ടിമറിക്കാനുള്ള മോക്ക് പോളിംഗ് ആണ് സംഘടനാ തിരഞ്ഞെടുപ്പിലൂടെ യൂത്ത് കോൺഗ്രസ് നടത്തിയതെന്ന് യുവമോർച്ച സംസ്ഥാന അദ്ധ്യക്ഷൻ പ്രഫുൽ കൃഷ്ണ പറഞ്ഞു.
ഷാഫി പറമ്പിൽ എംഎൽഎയുടെ അറിവോടെയാണ് വ്യാജ തിരിച്ചറിയൽ കാർഡുകൾ നിർമ്മിച്ചത്. ഉത്തരവാദിത്വം ഏറ്റെടുത്ത് എംഎൽഎ രാജി വയ്‌ക്കണം. രാജ്യസുരക്ഷയെ ബാധിക്കുന്ന പ്രശ്‌നമാണിത്. ദേശീയ അന്വേഷണ ഏജൻസികൾ അന്വേഷിക്കണമെന്നും പ്രഫുൽ കൃഷ്ണ വ്യക്തമാക്കി.
അതേസമയം കോൺഗ്രസിനെതിരെ കേസുമായി മുന്നോട്ട് പോകാനൊരുങ്ങുകയാണ് ബിജെപി. ഇത് സംബന്ധിച്ചു ഡിജിപിയ്‌ക്കടക്കം പരാതി നൽകിയിട്ടുണ്ടെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ അറിയിച്ചു.
