എറണാകുളം: തൃക്കാക്കരയിൽ വീണ്ടും ഭക്ഷ്യവിഷബാധ ഏറ്റതായി പരാതി. എറണാകുളം ആർടിഒ അനന്തകൃഷ്ണനും മകനുമാണ് ഭക്ഷ്യവിഷബാധയുണ്ടായത്. കളക്ടറേറ്റിന് സമീപമുള്ള ആര്യാസ് ഹോട്ടലിൽ നിന്ന് ഇരുവരും ഭക്ഷണം കഴിച്ചിരുന്നു. ഇതിന് പിന്നാലെയാണ് ഇരുവർക്കും ദേഹാസ്വാസ്ഥ്യം അനുഭവപ്പെട്ടത്. തുടർന്ന് അനന്തകൃഷ്ണനെ ആശുപത്രിയിൽ പ്രവേശിപ്പിച്ചു.
ഇന്നലെ വൈകിട്ടോടെയായിരുന്നു സംഭവം. ഹോട്ടലിൽ നിന്നും ഭക്ഷണം കഴിച്ചതിന് പിന്നാലെ ആരോഗ്യനില മോശമായി. തുടർന്ന് അനന്തകൃഷ്ണനെ ആശുപത്രിയിൽ പ്രവേശിപ്പിക്കുകയായിരുന്നു. മകനെ പ്രാഥമിക ചികിത്സകൾക്ക് ശേഷം വിട്ടയച്ചു. ആശുപത്രിയിൽ എത്തിച്ചതിന് ശേഷം നടത്തിയ പരിശോധനയിൽ ഭക്ഷ്യവിഷബാധയെ തുടർന്നാണ് ആരോഗ്യനില മോശമായതെന്ന് കണ്ടെത്തി.
ഹോട്ടലിൽ നിന്നും കഴിച്ച ചട്‌നിയാണ് ഭക്ഷ്യവിഷബാധയ്‌ക്ക് കാരണമായതെന്നാണ് ഡോക്ടർമാർ നൽകുന്ന പ്രാഥമിക വിവരം. ആർടിഒയുടെ പരാതിയെ തുടർന്ന് ഭക്ഷ്യവകുപ്പ് ഹോട്ടലിൽ പരിശോധന നടത്തി. ഇവിടെ നിന്നും സാമ്പിളുകൾ ശേഖരിച്ച് പരിശോധനയ്‌ക്കായി അയച്ചിട്ടുണ്ട്.
