വർഷങ്ങൾക്ക് ശേഷം തന്റെ സഹതാരത്തെ കണ്ടുമുട്ടിയ സന്തോഷം ആരാധകരുമായി പങ്കുവെച്ചിരിക്കുകയാണ് നടി മാധുരീ ദീക്ഷിത്. സഹതാരം മാറ്റാരുമല്ല നമ്മുടെ സ്റ്റൈൽ മന്നൻ രജനികാന്ത് തന്നെ. മുംബൈ വിമാനത്താവളത്തിൽ വച്ച് രജനികാന്തിനെ കണ്ടുമുട്ടിയതിനെക്കുറിച്ചാണ് മാധുരീ ദീക്ഷിത് പങ്കുവച്ചത്.
View this post on Instagram
ഭർത്താവ് ശ്രീരാം നേനേക്കും രജനികാന്തിനുമൊപ്പമുള്ള ചിത്രം നടി ഇൻസ്റ്റാഗ്രാമിൽ പങ്കിട്ടു. ഒപ്പം ഇരുവരും ഒന്നിച്ച ഉത്തർ ദക്ഷിൺ സിനിമയുടെ ഓർമ്മകളും താരം ആരാധകർക്കായി പങ്കിട്ടു. ഷൂട്ടിങ്ങിനിടയിൽ രജനികാന്ത് തന്നോട് മറാത്തി ഭാഷയിൽ സംസാരിക്കുമായിരുന്നു. മാത്രമല്ല എല്ലാകാര്യത്തിലും വലിയ പ്രചോദനമായി നിൽക്കുന്ന വ്യക്തി കൂടിയാണ് അദ്ദേഹമെന്നും താരം കുറിച്ചു.
രജനികാന്തിനെ വീണ്ടും കണ്ടുമുട്ടിയതിൽ വളരെ സന്തോഷമുണ്ട്. അദ്ദേഹത്തിന്റെ എളിമയും മറ്റുള്ളവരോടുള്ള ബഹുമാനവും തന്നെ എപ്പോഴും അതിശയപ്പെടുത്തുന്നു. 1987-ൽ പ്രഭാത് ഖന്ന സംവിധാനം ചെയ്ത് തിയേറ്ററുകളിലെത്തിയ ആക്ഷൻ ചിത്രമാണ് ഉത്തർ ദക്ഷിൺ. രജനികാന്ത്, ജാക്കി ഷ്റോഫ്, മാധുരി ദീക്ഷിത്, ഭാരതി വിഷ്ണുവർധൻ എന്നിവരായിരുന്നു ചിത്രത്തിൽ മുഖ്യവേഷങ്ങളിൽ.
