അടുത്തിടെ സമൂഹമാദ്ധ്യമങ്ങളിൽ വൻ തോതിൽ ചർച്ചയ്‌ക്ക് വഴിവെച്ച ഒന്നാണ് ഫ്രൈഡ് റൈസ് സിൻഡ്രോം. 5 ദിവസം പഴക്കം ചെന്ന ഫ്രിഡ്ജിൽ വയ്‌ക്കാത്ത പാസ്ത കഴിച്ചതു മൂലം യുവാവ് മരണപ്പെട്ടതിനെ തുടർന്നായിരുന്നു ഫ്രൈഡ് റൈസ് സിൻഡ്രോം ചർച്ചകൾക്ക് വഴിവച്ചത്. എന്താണ് ഫ്രൈഡ് റൈസ് സിൻഡ്രോം? എന്തൊക്കെയാണ് ഇതിന്റെ ലക്ഷണങ്ങൾ? അറിയാം..
പഴക്കം ചെന്ന ഭക്ഷണങ്ങളിൽ ബാസിലസ് സീരിയസ് ബാക്ടീരിയകൾ പെരുകിയുണ്ടാകുന്ന ഭക്ഷ്യവിഷബാധയാണ് ഫ്രൈഡ് റൈസ് സിൻഡ്രോമിന് പ്രധാന കാരണം. ഇത് കരളിനെയാണ് ബാധിക്കുക. സാധാരണ താപനിലയിൽ നിന്നും പുറത്തു വയ്‌ക്കുന്ന ഭക്ഷണങ്ങളിൽ ഏതാനും മണിക്കൂറുകൾക്കുള്ളിൽ ഈ ബാക്ടീരിയ വളരുമെന്നാണ് വിദഗ്ധർ പറയുന്നത്. ചോറ്, പാസ്ത തുടങ്ങിയ അന്നജം അടങ്ങിയ ഭക്ഷണങ്ങളിലാണ് ഈ ബാക്ടീരിയകളുടെ സാന്നിധ്യം കാണപ്പെടുന്നത്. ബാക്ടീരിയകൾ പുറത്തു വിടുന്ന വിഷവസ്തു മരണത്തിനും കാരണമാകുന്നു.
ലക്ഷണങ്ങൾ
ബാസിലസ് സീരിയസ് ബാക്ടീരിയകൾ അടങ്ങിയ ഭക്ഷണങ്ങൾ കഴിക്കുന്നവരിൽ ആദ്യ ലക്ഷണമായി ഛർദ്ദിയും വയറുവേദനയുമാണ് കാണപ്പെടുന്നത്. തുടർന്ന് ഇത് പനിയിലേക്കും കടുത്ത വയറിളക്കത്തിലേക്കും വഴിവെയ്‌ക്കുന്നു. ബാക്ടീരിയ പുറത്ത് വിടുന്ന വിഷാംശം കുടലിലെത്തുന്നതോടെ മരണം സംഭവിക്കാമെന്നും വിദഗ്ധർ പറയുന്നു.
