കോഴിക്കോട്: നവകേരള സദസിന്റെ ഭാഗമായി വീടുകളിൽ ദീപം തെളിയിക്കാൻ നിർദ്ദേശം. കോഴിക്കോട് പുറമേരി പഞ്ചായത്താണ് ജനങ്ങൾക്ക് ഇത്തരത്തിൽ നിർദ്ദേശം നൽകിയിരിക്കുന്നത്. ഇന്ന് വൈകിട്ട് 6.30 നാണ് വീടുകളിൽ ദീപം തെളിയിക്കാൻ നിർദ്ദേശം നൽകിയിരിക്കുന്നത്. നാളെ വൈകിട്ട് 3 മണിക്ക് മേമുണ്ടയിൽ നവകേരളസദസ് നടക്കുന്നതിന്റെ ഭാഗമായാണ് നിർദ്ദേശം.
അതേസമയം കൊയിലാണ്ടിയിൽ 25 ന് നടക്കുന്ന നവകേരള സദസിന്റെ ഭാഗമായി ഇന്ന് മുതൽ 25 വരെ കൊയിലാണ്ടി മുൻസിപ്പാലിറ്റിയിലെ എല്ലാ സ്ഥാപനങ്ങളിലും വൈദ്യുത ദീപാലങ്കാരം നടത്തണമെന്ന് നിർദ്ദേശിച്ച് കൊയിലാണ്ടി നഗരസഭ സെക്രട്ടറി നോട്ടീസ് പുറത്തുവിട്ടു. പരിപാടിയുടെ ഭാഗമായി സ്ഥാപനങ്ങളുടെ മുൻവശവും പരിസരവും വൃത്തിയാക്കണമെന്നും നഗരസഭ അറിയിച്ചു. നഗരസഭ സെക്രട്ടറി, ചെയർപേഴ്സൺ എന്നിവരുടെ പേരിലാണ് നോട്ടീസ് പുറത്തു വിട്ടിരിക്കുന്നത്.
അതേസമയം മുഖ്യമന്ത്രിയുടെ വിവാദ പരിപാടിയിൽ ജീവനക്കാരെ അണിനിരത്താൻ ആവശ്യപ്പെട്ട് കോഴിക്കോട് സിവിൽ സ്റ്റേഷനിലെ വകുപ്പു മേധാവികൾക്ക് ജില്ലാ പഞ്ചായത്ത് പ്രസിഡൻറ് കത്ത് നൽകിയത് കഴിഞ്ഞ ദിവസം വിവാദമായിരുന്നു. പ്രസിഡൻറിന്റെ നടപടി ചട്ടവിരുദ്ധമാണെന്ന് ചൂണ്ടിക്കാട്ടി ജീവനക്കാരുടെ സംഘടന രംഗത്തെത്തിയിരുന്നു.
