ചില ആഹാരങ്ങൾ കഴിച്ചാൽ ശരീരത്തിൽ അലർജി ഉണ്ടാകുന്ന നിരവധി ആളുകൾ കാണും. വളരെ ചുരുക്കം ചില ഭക്ഷണങ്ങളോട് മാത്രമായിരിക്കും ഇത്തരക്കാർക്ക് അലർജി. എന്നാൽ, സിയോൾ സ്വദേശിയായ ജോവാൻ ഫാൻ എന്ന 21 കാരിയ്ക്ക് ഒന്നും രണ്ടുമല്ല 37-ൽ അധികം ഭക്ഷണങ്ങളോടാണ് അലർജി. തനിക്കുള്ള അസുഖത്തെക്കുറിച്ചും ഇത്തരത്തിലെ അലർജിയെ അതിജീവിക്കാൻ താൻ എന്തൊക്കെയാണ് ചെയ്യുന്നതെന്നും സമൂഹമാദ്ധ്യമത്തിലൂടെ ഈ യുവതി പറയുന്നു.
വളരെ നിയന്ത്രിതമായ ഭക്ഷണക്രമത്തിലൂടെയാണ് ഇവർ ഓരോ ദിവസവും കഴിച്ചു കൂട്ടുന്നത്. ഒരു സോഷ്യൽ മീഡിയ കണ്ടന്റ് ക്രിയേറ്റർ ആയ ജോവാൻ ഫാൻ തന്റെ അപൂർവ്വമായ അസുഖത്തെ എങ്ങനെയാണ് തരണം ചെയ്യുന്നതെന്ന് നിരവധി വീഡിയോകളിലൂടെയാണ് പുറം ലോകത്തെ അറിയിച്ചത്.
പരിപ്പ് വർഗത്തിൽപ്പെട്ട എല്ലാ ഭക്ഷ്യ വസ്തുക്കളോടും മുഴുവൻ കടൽ ഭക്ഷണങ്ങളോടും ഇവർക്ക് അലർജിയാണ്. ഇത്തരത്തിൽ അലർജിയുണ്ടാക്കുന്ന സാധനങ്ങളുടെ ലിസ്റ്റ് എടുത്താൽ 37 ലധികം വരുമെന്നാണ് ജോവാൻ പറയുന്നത്. തനിക്ക് മരിക്കാൻ 37-ൽ അധികം വഴികളുണ്ടെന്ന് പറഞ്ഞു കൊണ്ടാണ് ഭക്ഷണത്തെക്കുറിച്ചുള്ള വീഡിയോ പങ്കുവച്ചിരിക്കുന്നത്. അടുത്തിടെ നടത്തിയ ഒരു വൈദ്യപരിശോധനയിൽ മുന്തിരിങ്ങ പോലും ജോവാന് അലർജിയുണ്ടാക്കുന്ന ഭക്ഷ്യവസ്തുവാണെന്ന് കണ്ടെത്തി.
കൂടാതെ, തനിക്ക് കഴിയ്ക്കാൻ കഴിയാത്ത ഭക്ഷണ ക്രമങ്ങളുടെ കൂട്ടത്തിലേക്ക് ഓരോ ദിവസവും പുതിയ പേരുകൾ ചേർക്കപ്പെടുകയാണെന്നും യുവതി പറയുന്നുണ്ട്. തനിക്ക് കഴിയ്ക്കാൻ കഴിയാത്ത ഭക്ഷണമാണ് കഴിയ്ക്കുന്നതെങ്കിൽ 10 മിനിറ്റിനുള്ളിൽ ശരീരം ചുവന്ന് തടിയ്ക്കുകയും കഠിനമായ ചൊറിച്ചിൽ അനുഭവപ്പെടുകയും ചെയ്യും. ഈ പ്രശ്നമുള്ളത് കൊണ്ട് തന്നെ താൻ വളരെ ശ്രദ്ധാപൂർവമാണ് ഓരോ ഭക്ഷണവും കഴിയ്ക്കാൻ തിരഞ്ഞെടുക്കുന്നതെന്നും വീഡിയോയിൽ ജോവൻ പറയുന്നുണ്ട്. അലർജിയിൽ നിന്നും രക്ഷപ്പെടാനായി താൻ ശരീരത്തിൽ എപ്പോഴും ജലാംശം നിലനിർത്തുമെന്നും യുവതി പറയുന്നുണ്ട്.
