ചെന്നൈ: തമിഴ് സിനിമയിലെ ആദ്യ ഇന്നിംഗ്സ് പൂർത്തീകരിച്ച് മുൻ ഇന്ത്യൻ ക്രിക്കറ്റ് ടീം നായകൻ കപിൽദേവ്. രജനീകാന്തിന്റെ മകൾ ഐശ്വര്യ സംവിധാനം ചെയ്യുന്ന ലാൽസലാം എന്ന സിനിമയിലാണ് കപിൽ അഭിനയിച്ചത്. കുറച്ച് ദിവസങ്ങൾക്ക് മുമ്പാണ് ഈ സിനിമയുടെ ചിത്രീകരണം പൂർത്തീകരിച്ചത്. ഇപ്പോഴിതാ, ലാൽസലാമിന്റെ ഡബ്ബിങ് പൂർത്തീകരിച്ച വിവരമാണ് കപിൽ ദേവ് എക്സിലൂടെ അറിയിച്ചിരിക്കുന്നത്.
ഹിന്ദി, തെലുങ്ക് സിനിമകളിൽ അഭിനയിച്ചിട്ടുള്ള കപിൽദേവിന്റെ ആദ്യ തമിഴ് ചിത്രമായ ലാൽസലാം ക്രിക്കറ്റുമായി ബന്ധമുള്ളതാണ്. വിഷ്ണു വിശാലാണ് നായകൻ. ചിത്രത്തിൽ രജനീകാന്തും പ്രത്യക്ഷപ്പെടുന്നുണ്ട്. സെന്തിൽ, ജീവിത, തമ്പി രാമയ്യ, അനന്തിക സനിൽകുമാർ, വിവേക് പ്രസന്ന, തങ്കദുരൈ എന്നിവരാണ് ചിത്രത്തിൽ മറ്റ് വേഷം ചെയ്യുന്നത്.
എ.ആർ. റഹ്മാനാണ് സംഗീതസംവിധാനം. വിഷ്ണു രംഗസ്വാമിയുടേതാണ് കഥയും സംഭാഷണങ്ങളും. ഛായാഗ്രഹണം – വിഷ്ണു രംഗസാമി, എഡിറ്റർ – പ്രവീൺ ഭാസ്കർ, ആർട്ട് -രാമു തങ്കരാജ്, കോറിയോഗ്രഫി -ദിനേഷ്, സംഘട്ടനം -അനൽ അരസ്, കിക്കാസ് കാളി, സ്റ്റണ്ട് വിക്കി, ഗാനരചന-കബിലൻ. ചിത്രം 2024 പൊങ്കൽ റിലീസായി തിയേറ്ററുകളിലെത്തും.