തിരുവനന്തപുരം: ടി20 പരമ്പരയിലെ രണ്ടാം മത്സരത്തിനായി ഇന്ത്യ, ഓസ്‌ട്രേലിയ ടീം അംഗങ്ങൾ തിരുവനന്തപുരത്തെത്തി. ഇരുടീമുകളും ഒരുമിച്ച് പ്രത്യേക വിമാനത്തിലാണ് തിരുവനന്തപുരത്ത് ഇന്ന് വൈകിട്ട് എത്തിയത്. എയർപോർട്ടിന്റെ ശംഖുമുഖത്തെ ആഭ്യന്തര ടെർമിനലിൽ എത്തിയ താരങ്ങൾക്ക് ആരാധകർ വൻ വരവേൽപ്പാണ് നൽകിയത്.
നഗരത്തിലെ ഹയാത്ത് റീജൻസി, താജ് വിവാന്ത ഹോട്ടലുകളിലാണ് ടീമുകൾ തങ്ങുന്നത്. നാളെ ഉച്ചയ്‌ക്ക് 1 മുതൽ 4 വരെ ഓസ്‌ട്രേലിയൻ ടീമും 5 മുതൽ 8 വരെ ഇന്ത്യൻ ടീമും മത്സരവേദിയായ കാര്യവട്ടം സ്‌പോർട്‌സ് ഹബ് സ്‌റ്റേഡിയത്തിൽ പരിശീലനം നടത്തും. ഞായറാഴ്ച ഉച്ചയ്‌ക്ക് 1.30 മുതലാണ് മത്സരം.
വിശാഖപട്ടണത്ത് നടന്ന ആദ്യ മത്സരത്തിൽ 2 വിക്കറ്റിന് ഓസ്‌ട്രേലിയയെ ഇന്ത്യ തകർത്തിരുന്നു.
