തണുത്ത പ്രഭാതവും ഒരു കപ്പ് ചൂട് ചായയും. ഇത്ര നല്ല കോമ്പിനേഷൻ മറ്റെന്തുണ്ട്.. തണുപ്പ് കാരണം ഉണർവ് ഇല്ലാതെ ഒരു തരം മടുപ്പ് തോന്നുവർക്ക് ഒരു ചൂട് ചായ നൽകുന്ന ഉന്മേഷം ചെറുതൊന്നുമല്ല. ഉന്മേഷത്തിന് മാത്രമല്ല അതോടൊപ്പം ശൈത്യകാലത്തെ ആരോഗ്യസംരക്ഷണത്തിലും ചായക്ക് നല്ലൊരു പങ്ക് ഉണ്ട്. സാധാരണ തേയിലയും പഞ്ചസാരയും മാത്രം ഉപയോഗിച്ച് ചായ ഉണ്ടാക്കുന്നതിൽ ഒരു മാറ്റം പരീക്ഷിച്ച് നോക്കിയാലോ? അതിനായി പരീക്ഷിച്ച് നോക്കാൻ പറ്റിയ അഞ്ച് ചായകൾ ഇതാ…
1.മസാല ചായ
ഒരുവിധം എല്ലാവർക്കും അറിയാവുന്ന ഒന്നാണ് മസാല ചായ. പാൽ, തേയില എന്നിവയോടൊപ്പം തിരഞ്ഞെടുത്ത സുഗന്ധവ്യഞ്ജനങ്ങൾ കൂടി ഉൾപ്പെടുത്തിയാണ് ഇത് തയ്യാറാക്കുന്നത്. ഏലം, കറുവപ്പട്ട, ഗ്രാമ്പു, ഇഞ്ചി, കുരുമുളക് മുതലായവയാണ് ഇതിൽ ഉൾപ്പെടുത്തുന്നത്. മസാല ചായയിൽ അടങ്ങിയിരിക്കുന്ന ഇവ രുചി മാത്രമല്ല ആരോഗ്യ ഗുണങ്ങളും ഉൾപ്പെട്ടിട്ടുണ്ട്. ഇഞ്ചി ദഹനത്തെ സഹായിക്കുമ്പോൾ കറുവാപ്പട്ട ശരീര താപനില നിയന്ത്രിക്കുന്നതിന് സഹായിക്കും.
2. നാരങ്ങ- കുരുമുളക് ചായ
വ്യത്യസ്തമായ കോമ്പിനേഷനാണ് നാരങ്ങ കുരുമുളക് ചായ. നാരങ്ങയുടെ ചെറിയ പുളിയും കുരമുളകിന്റെ ചെറിയ എരിവും വ്യത്യസ്തമായ രുചിയാണ് നൽകുക. തണുപ്പ് കാലത്ത് സാധാരണയായി കണ്ട് വരുന്ന ജലദോഷം, ചുമ, പനി എന്നിവയ്ക്ക് ശമനം നൽകാൻ ഈ ചായക്കാവും. ചെറുനാരങ്ങയിൽ അടങ്ങിയിരിക്കുന്ന വിറ്റാമിൻ സി രോഗപ്രതിരോധ ശേഷി വർദ്ധിപ്പിക്കാനും സഹായിക്കും.
3. ഇഞ്ചി- പുതിന ചായ
ഇഞ്ചിയും പുതിനയും ചേർത്തൊരു ചായ. ഇഞ്ചിയുടെ ചൂടും പുതിനയുടെ തണുപ്പും ശരീരതാപനില നിയന്ത്രിക്കുവാൻ ഉത്തമമാണ്. നിരവധി ഗ്രീൻ ടീ ബാഗുകളിൽ ഈ കോമ്പിനേഷൻ ലഭിക്കുമെങ്കിലും സ്വന്തമായി വളരെ പെട്ടെന്ന് തന്നെ ഇത് ഉണ്ടാക്കുവാനും സാധിക്കും.
ശൈത്യകാലവുമായി ബന്ധപ്പെട്ട ജലദോഷം, തൊണ്ടവേദന എന്നിവയിൽ നിന്ന് ആശ്വാസം നൽകുന്നു. ഇതിനൊപ്പം ചേർത്ത പുതിന മെച്ചപ്പെട്ട ദഹനത്തിനും ശരീരത്തെ ശാന്തമാക്കുന്നതിനും സഹായിക്കും.
4. കറുവപ്പട്ട- ഏലക്ക ചായ
കറുവപ്പട്ടയിൽ ആന്റിമൈക്രോബയൽ ഗുണങ്ങൾ അടങ്ങിയിട്ടുണ്ട്. ഇത് ഇൻഫ്ളുവൻസ അണുബാധ പോലെയുള്ള രോഗങ്ങൾ വരുന്നത് തടയും. കൂടാതെ ശരീരത്തിലെ രക്തചംക്രമണം മെച്ചപ്പെടുത്താൻ സഹായിക്കുന്ന ആന്റിഓക്സിഡന്റുകൾ ഏലയ്ക്കയിൽ അടങ്ങിയിട്ടുണ്ട്.
5. ചമോമൈൽ- കറുവപ്പട്ട ചായ
ഡെയ്സി പൂക്കളുടെ ഇനത്തിൽ പെട്ട ഒന്നാണ് ചമോമൈൽ. ധാരളം ആരോഗ്യ ഗുണങ്ങൾ ഇതിൽ അടങ്ങിയിട്ടുണ്ട്്. കറുവപ്പട്ടയും ചമോമൈലും അടങ്ങിയ ചായ രുചിയോടൊപ്പം ഉന്മേഷവും പ്രദാനം ചെയും. ഉദരസംബന്ധമായ പ്രശ്നങ്ങൾക്കും ഏറ്റവും ഉത്തമമാണ് ചമോമൈൽ കറുവപ്പട്ട ചായ.