സിനിമാ പ്രേക്ഷകർ ഒന്നടങ്കം കാത്തിരിക്കുന്ന ചിത്രമാണ് പുഷ്പ 2. ചിത്രത്തിന്റെ ഒന്നാം ഭാഗം ആരാധകർക്കിടയിൽ ഉണ്ടാക്കിയ ആവേശം ചെറുതൊന്നുമല്ല. സാധാരണ അഭിനയിക്കുന്ന കഥാപാത്രങ്ങളിൽ നിന്നും വ്യത്യസ്തമായ കഥാപാത്രമായാണ് അല്ലു അർജുൻ ചിത്രത്തിൽ എത്തിയത്. പുഷ്പ യുടെ രണ്ടാം ഭാഗം 2024 ഓഗസ്റ്റ് 15 ന് പ്രദർശനത്തിനെത്തും.
ചിത്രത്തെകുറിച്ച് വന്നിരിക്കുന്ന പുതിയ റിപ്പോർട്ടാണ് ഇപ്പോൾ ചർച്ചാ വിഷയം. ബിഗ് ബജറ്റിൽ ഒരുങ്ങുന്ന ചിത്രത്തിനായി അല്ലു അർജുൻ പ്രതിഫലം വാങ്ങിയില്ലെന്നും പകരം ലാഭവിഹിതമാണ് കൈപ്പറ്റുന്നതെന്നുമാണ് റിപ്പോർട്ട്. ലാഭവിഹിതത്തിന്റെ 33 ശതമാനമാണ് താരം കൈപ്പറ്റുക. കഴിഞ്ഞ ദിവസമാണ് ചിത്രത്തിന്റെ ഒടിടി റെറ്റ്സ് നെറ്റ്ഫ്ളിക്സ് സ്വന്തമാക്കിയത്. എന്നാൽ എത്ര തുകയ്ക്കാണെന്ന് വ്യക്തമാക്കിയിട്ടില്ല.
പുഷ്പയിൽ പ്രതിനായക വേഷത്തിൽ എത്തുന്നത് ഫഹദ് ഫാസിലാണ്. ബൻവാർ സിംഗ് ഷെഖാവത്ത് എന്ന ഐപിഎസ് ഉദ്യോഗസ്ഥനായാണ് ഫഹദ് എത്തുന്നത്. സുകുമാർ സംവിധാനം ചെയ്യുന്ന ചിത്രത്തിൽ രശ്മിക മന്ദാന, പ്രകാശ് രാജ്, ജഗപതി ബാബു എന്നിവരുൾപ്പെടെയുള്ള താരനിര തന്നെയുണ്ട്. ചിത്രത്തിന്റെ സംഗീത സംവിധാനം നിർവഹിക്കുന്നത് ദേവി ശ്രീ പ്രസാദാണ്.
