സുരേഷ് ഗോപി കേരളത്തിൽ മന്ത്രിയാകേണ്ട സമയം കഴിഞ്ഞെന്ന് നടൻ കൊല്ലം തുളസി. അടുത്ത തിരഞ്ഞെടുപ്പിൽ തൃശൂരിൽ അദ്ദേഹം സ്ഥാനാർത്ഥിയായി നിൽക്കുകയാണെങ്കിൽ വിജയിക്കുമെന്നും അദ്ദേഹം പറഞ്ഞു. സുരേഷ് ഗോപി മന്ത്രിയാവുകയാണെങ്കിൽ കേരളത്തിനാണ് ഒരുപാട് ഗുണം ചെയ്യുന്നതെന്നും കൊല്ലം തുളസി കൂട്ടിച്ചേർത്തു. ഒരു മാദ്ധ്യമത്തിന് നൽകിയ അഭിമുഖത്തിനിടെയായിരുന്നു അദ്ദേഹം ഇക്കാര്യങ്ങൾ പറഞ്ഞത്.
‘സുരേഷ് ഗോപി കേരളത്തിൽ മന്ത്രി ആകേണ്ട സമയം കഴിഞ്ഞു. അദ്ദേഹത്തിന് നല്ലൊരു വില കൊടുക്കാൻ പലരും താല്പര്യപ്പെടുന്നില്ല. വരുന്ന തിരഞ്ഞെടുപ്പിൽ തൃശൂരിൽ അദ്ദേഹത്തിന് ജയ സാധ്യത ഉണ്ടെന്നാണ് എന്റെ വിശ്വാസം. അദ്ദേഹം തൃശൂരിൽ നിൽക്കുകയാണെങ്കിൽ ഞാൻ ഇലക്ഷൻ പ്രചാരണത്തിനും പോകും. അവിടെ രാഷ്ട്രീയം നോക്കിയല്ല പോകുന്നത്. വ്യക്തി ബന്ധങ്ങൾക്കാണ് പ്രാധാന്യം. കാരണം ഒരാളെങ്കിലും മന്ത്രിയായാൽ കേരളത്തിന് വേണ്ടി ഒരുപാട് കാര്യങ്ങൾ ചെയ്യും, ഒരുപാട് നന്മ വരും.
ഒ രാജഗോപാൽ വന്നപ്പോൾ റെയിൽവേയ്ക്ക് കിട്ടിയ കാര്യങ്ങൾ വളരെ വ്യക്തമാണല്ലോ… അതുപോലെ സുരേഷ്ഗോപി എന്നയാൾ മന്ത്രിയാകുക ആണെങ്കിൽ അത് കേരളത്തിന് ഒരുപാട് ഗുണം ചെയ്യും. അദ്ദേഹത്തിന്റെ പ്രസംഗങ്ങൾ ഒക്കെ പ്രശംസിക്കേണ്ടതാണ്. എല്ലാം ശുദ്ധമനസ്സോടെ പറയുന്നതാണ്. അദ്ദേഹം ചെയ്യുന്ന ചാരിറ്റി പ്രവർത്തനങ്ങളും മറ്റുള്ളവർക്ക് ഒരു പ്രചോദനമാണെന്നും കൊല്ലം തുളസി കൂട്ടിച്ചേർത്തു.
