ചില വിദേശരാജ്യങ്ങളിലെ ശുചിത്വവും പ്രകൃതി സൗന്ദര്യവും കണ്ട് അവയെ വാതോരാതെ പുകഴ്ത്തുന്നവരാണ് നമ്മൾ. എന്നാൽ വൃത്തിക്ക് പേരുക്കേട്ട സ്വിറ്റ്സർലൻഡ് പോലും തോറ്റു പോകുന്ന തരത്തിൽ പ്രകൃതി ഭംഗിക്കും ശുചിത്വത്തിനും പേരുകേട്ട ഒരു നഗരമുണ്ട് നമ്മുടെ ഈ ഇന്ത്യാ മഹാരാജ്യത്തിൽ. വടക്കുകിഴക്കൻ ഇന്ത്യയുടെ സ്വിറ്റ്സർലൻഡ് എന്നറിയപ്പെടുന്ന ദിമ ഹസാവോ എന്ന കൊച്ചു ഗ്രാമമാണ് വിനോദസഞ്ചാരികളെ ആകർഷിക്കുന്നത്. അസമിലാണ് ഈ പ്രദേശമുള്ളത്.
വൃത്തിയുടെ കാര്യത്തിൽ മുൻപന്തിയിൽ നിൽക്കുന്ന ഇവിടം പൂർണമായും പ്ലാസ്റ്റിക് വിമുക്ത ഗ്രാമമാണ്. കൃഷി ജീവിതമാർഗമാക്കിയ ഒരു കൂട്ടം ജനതയാണ് ഇവിടെ ജീവിക്കുന്നത്. വിനോദസഞ്ചാരികളുടെ കണ്ണിനു കുളിരേകുന്ന കാഴ്ചകൾ സമ്മാനിക്കുന്ന ദിമാ ഹസാവോയിലെ തുരങ്കങ്ങളും അതിലൂടെയുള്ള ട്രെയിൻ യാത്രകളും വിനോദസഞ്ചാരികൾക്ക് മികച്ച യാത്രാനുഭവം നൽകുന്നു. ത്രികോണാകൃതിയിലുള്ള ഒരു കറുത്ത മണൽക്കല്ലിൽ കൊത്തിയ പാറയിൽ നിർമ്മിച്ച ക്ഷേത്രമാണ് മൈബാംഗ്. ഈ ക്ഷേത്രവും നഗരത്തെ ശ്രദ്ധേയമാക്കുന്നു. മഹാമായയാണ് ഇവിടുത്തെ പ്രതിഷ്ഠ.
മനോഹരാമായ കാലാവസ്ഥയ്ക്കും പ്രകൃതി സൗന്ദര്യത്തിനും പേരുകേട്ട ഹാഫ്ലോങ് നഗരവും കൊളോണിയൽ കാലഘട്ടം മുതലേ പ്രസിദ്ധമാണ്. ആ കാലഘട്ടത്തിന്റെ ശൈലിയിൽ തന്നെയാണ് ഇപ്പോഴും ഈ നഗരത്തെ പരിപാലിച്ചു പോരുന്നത്. ഹഫ്ലോങിൽ നിന്നും ഏതാനും കിലോമീറ്റർ അകലെയുള്ള ജതിങ്ക ഗ്രാമത്തിലെത്തുന്ന ദേശാടനപക്ഷികളെ കാണാനായി വിവിധ രാജ്യങ്ങളിൽ നിന്നു പോലും വിനോദസഞ്ചാരികൾ എത്താറുണ്ട്. ജീവിതത്തിന്റെ സുന്ദര നിമിഷങ്ങൾ ചെലവഴിക്കാൻ ആഗ്രഹിക്കുന്നവരും യാത്രാപ്രേമികളും ഒരിക്കല്ലെങ്കിലും കണ്ടിരിക്കേണ്ട സ്ഥലമാണിവിടം.
