കോട്ടയം ; ടെർമിനൽ സ്റ്റേഷനായി മാറാനുള്ള കോട്ടയത്തിന്റെ സാധ്യതകൾ സജീവമാകുന്നു . ചെന്നൈ–കോട്ടയം വന്ദേഭാരത് എക്സ്പ്രസ് സർവീസിനു ദക്ഷിണ റെയിൽവേ ശുപാർശ ചെയ്തതോടെയാണ് ടെർമിനൽ സ്റ്റേഷനായി മാറാനുള്ള സാധ്യത കൈവന്നത് .
നിലവിൽ കോട്ടയം– നിലമ്പൂർ എക്സ്പ്രസ് മാത്രമാണു കോട്ടയത്തു നിന്നാരംഭിക്കുന്ന എക്സ്പ്രസ് ട്രെയിൻ. എട്ട് കാറുകളുള്ള റേക്ക് ഉപയോഗിച്ചു വന്ദേഭാരത് സർവീസ് നടത്താനാണു റെയിൽവേ ശുപാർശ. ട്രെയിൻ വൃത്തിയാക്കൽ, വെള്ളം നിറയ്ക്കൽ എന്നിവയാണു കോട്ടയം സ്റ്റേഷനിൽ നടത്തേണ്ടത്. അറ്റകുറ്റപ്പണി ചെന്നൈയിൽ നടത്തും. കോട്ടയത്തെ 3,4 പ്ലാറ്റ്ഫോമുകളിൽ വെള്ളം നിറയ്ക്കാനുള്ള സംവിധാനം ഇപ്പോഴുണ്ട്. രണ്ടര മണിക്കൂർ കൊണ്ടു ട്രെയിൻ വൃത്തിയാക്കി വെള്ളം നിറയ്ക്കാൻ കോട്ടയത്തെ ഇപ്പോഴുള്ള സംവിധാനങ്ങൾ വഴി സാധിക്കും. കോട്ടയത്തെ 1 എ പ്ലാറ്റ്ഫോമിലും വന്ദേഭാരത് നിർത്തിയിടാം.
വെള്ളി, ഞായർ ദിവസങ്ങളിൽ ചെന്നൈയിൽനിന്ന് ഉച്ചയ്ക്കു 2നു പുറപ്പെട്ടു രാത്രി 11നു കോട്ടയത്ത് എത്തുന്ന സർവീസ്. ശനി, തിങ്കൾ ദിവസങ്ങളിൽ കോട്ടയത്തുനിന്നു വെളുപ്പിനെ 4നു പുറപ്പെട്ട് ഉച്ചയ്ക്കു 1നു ചെന്നൈയിൽ എത്തുന്ന സർവീസുമാണ് ഇപ്പോൾ ശുപാർശയിലുള്ളത്.
