സീതപ്പഴം- എല്ലാവർക്കും സുപരിചിതമായ പഴം. അത്തപ്പഴമെന്നും ഇത് അറിയപ്പെടുന്നു. വിറ്റാമിനുകൾ, ധാതുക്കൾ, അയേൺ, കാത്സ്യം, പൊട്ടാസ്യം, മഗ്നീഷ്യം തുടങ്ങിയവയാൽ സമ്പന്നമായ സീതപ്പഴം ആരോഗ്യകരമായ പഴങ്ങളുടെ പട്ടികയിലുള്ളതാണ്. ആരോഗ്യ ഗുണങ്ങളേറെയുള്ള ഫലമാണ് സീതപ്പഴം എന്ന കസ്റ്റാർഡ് ആപ്പിൾ.
വിറ്റാമിൻ സിയും ആൻറിഓക്സിഡൻറുകളും കൊണ്ട് സമ്പുഷ്ടമായ സീതപ്പഴം ശരീരത്തിന്റെ പ്രതിരോധശേഷി കൂട്ടാൻ സഹായിക്കുന്നു. കൗറനോയിക് ആസിഡ്, വിറ്റാമിൻ സി ഫ്ലേവനോയിഡുകൾ, കരോട്ടിനോയിഡുകൾ തുടങ്ങിയ സംയുക്തങ്ങൾ ഇതിൽ അടങ്ങിയിട്ടുണ്ട്. അതുകൊണ്ട് തന്നെ വിട്ടുമാറാത്ത രോഗങ്ങളിൽ നിന്ന് രക്ഷനേടാൻ കസ്റ്റാർഡ് ആപ്പിൾ സഹായിക്കും. ഫൈബർ ധാരാളം അടങ്ങിയ സീതപ്പഴം മലബന്ധം അകറ്റാനും ദഹനപ്രവർത്തനങ്ങൾ സുഗമമാക്കാനും സഹായിക്കും. ഇതിലെ ഫാറ്റി ആസിഡുകൾ ദഹനവ്യവസ്ഥയെ മെച്ചപ്പെടുത്തുന്നതിന് പുറമേ ശരീരത്തിനുണ്ടാകുന്ന വീക്കം കുറയ്ക്കാനും സഹായിക്കുന്നു.
കൊളസ്ട്രോൾ, രക്തസമ്മർദ്ദം എന്നിവ നിയന്ത്രിക്കുന്നതിനും സീതപ്പഴത്തെ കൂട്ടുപിടിക്കാവുന്നതാണ്. ഇതിലെ പൊട്ടാസ്യവും മഗ്നീഷ്യവും രക്തത്തിന്റെ സുഗമമായ ഒഴുക്കിനെ സഹായിക്കുന്നു. നിയാസിൻ വിറ്റാമിൻ സീതപ്പഴത്തിൽ അടങ്ങിയിട്ടുണ്ട്. ഇത് കൊളസ്ട്രോളിനെ കുറയ്ക്കുന്നു. ഹൃദ്രോഗം, സ്ട്രോക്ക്, ഹൃദയാഘാതം എന്നിവിയൽ നിന്ന് സ്വയം പരിരക്ഷ തേടാൻ കഴിക്കാവുന്നതാണ്. ചർമ്മത്തിന് നിറം നൽകാനും കണ്ണിന്റെയും തലച്ചോറിന്റെയും ആരോഗ്യം മെച്ചപ്പെടുത്താനും സീതപ്പഴം നല്ലതാണ്. വിളർച്ച തടയാനും സീതപ്പഴം കഴിക്കുന്നത് നല്ലതാണ്.
