കൊട്ടാരക്കര: ഓയൂർ സംഭവത്തിന് സമാനമായി കൊട്ടാരക്കര വാളകത്തും പെൺകുട്ടിയെ തട്ടികൊണ്ടുപോകാൻ ശ്രമം. കൊട്ടാരക്കര വാളകം ആർ.വി.വി.എച്ച്.എസിൽ പഠിക്കുന്ന 7-ാം ക്ലാസ്സുകാരിയെ തട്ടികൊണ്ടുപോകാനാണ് ശ്രമമുണ്ടായത്. എന്നാൽ കുട്ടി സമീപത്തെ വീട്ടിലേക്ക് ഓടി കയറിയതിനാൽ ശ്രമം പരാജയപ്പെട്ടു. ഒമ്നിയിലെത്തിയവരാണ് തട്ടികൊണ്ടുപോകാൻ ശ്രമിച്ചതെന്നാണ് നാട്ടുകാർ പറയുന്നത്.
വീട്ടിൽ നിന്നും ട്യൂഷന് പോകുന്നതിനിടെയാണ് സംഭവം നടന്നത്. ഇടവഴിയിൽ നിർത്തിയിട്ടിരുന്ന വാഹനം കുട്ടിയെ പിടിച്ചുകയറ്റാൻ ശ്രമിക്കുകയായിരുന്നു. പിടിവലിക്കിടെ അക്രമികൾ കുട്ടിയുടെ ഉടുപ്പ് വലിച്ചു കീറുകയും, ബാഗ് വലിച്ചെടുക്കുകയും ചെയ്തു. കുതറിമാറിയ കുട്ടി അടുത്തുള്ള വീട്ടിൽ അഭയം തേടിയതോടെയാണ് തട്ടികൊണ്ടുപോകൽ ശ്രമം പരാജയപ്പെട്ടത്. പോലീസ് സ്ഥലത്തെത്തി അന്വേഷണം ആരംഭിച്ചു. വാഹനം അഞ്ചൽ ഭാഗത്തേക്കാണ് പോതെന്നാണ് പ്രാഥമിക വിവരം. പ്രദേശത്തും വഴിയിലുമുള്ള സിസിടിവി ദൃശ്യങ്ങൾ പരിശോധിക്കുകയാണ് പോലീസ്.
കൊല്ലം ഓയൂരിലെ 6 വയസ്സുകാരിയെ തട്ടികൊണ്ടുപോകുകയും മോചനദ്യവ്യം ആവശ്യപ്പെടുകയും ചെയ്ത സംഭവത്തിന് പിന്നാലെയാണ് ഇത്. ഓയൂർ സംഭവം നടന്ന് മണിക്കൂറുകൾക്കുള്ളിലാണ് സമാനമായി വിധത്തിൽ ഇന്ന് 7-ാം ക്ലാസുകാരിയെ തട്ടികൊണ്ടുപോകാനുള്ള ശ്രമം ഉണ്ടായത് എന്നത് ഭീതി ഉയർത്തുന്നുണ്ട്.