ഇന്ത്യയിൽ ഏറ്റവും കൂടുതൽ ആരാധകരുള്ള കായിക താരങ്ങളിൽ ഒരാളാണ് മുൻ നായകൻ എംഎസ്ഡി. ആരാധകരോടുള്ള ലളിതമായ പെരുമാറ്റം കളിക്കളത്തിന് പുറത്തും ധോണിയെ പ്രിയങ്കരനാക്കി മാറ്റി. സെൽഫിക്കും ഓട്ടോഗ്രാഫിനുമായി സമീപിക്കുന്ന ആരാധകരെ പരമാവധി നിരാശരാക്കാതെയാണ് താരം മടക്കി അയക്കാറുള്ളത്. ആരാധകരുടെ സ്വന്തം ക്യാപ്റ്റൻ കൂൾ എംഎസ് ധോണി ഓട്ടോഗ്രാഫ് നൽകുന്ന ഒരു വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്.
ആരാധകന് ഓട്ടോഗ്രാഫ് നൽകുന്ന ഈ വീഡിയോയ്ക്ക് ഒരു പ്രത്യേകതയുണ്ട്. ബാറ്റിലോ ജഴ്സിയിലോ പേപ്പറിലോ ഒന്നുമല്ല, ട്രയംഫ് റോക്കറ്റ് 3ആർ ബൈക്കിന്റെ വൈസറിലാണ് ധോണി ആരാധകന് ഓട്ടോഗ്രാഫ് നൽകിയത്. അതും സ്വന്തം ടീഷർട്ട് ഉപയോഗിച്ച് ആ ഭാഗം വൃത്തിയാക്കിയതിന് ശേഷം. ഈ വീഡിയോയാണ് സമൂഹമാദ്ധ്യമങ്ങളിൽ ആരാധകരുടെ മനം കവർന്നത്.
സുമീത് കുമാർ ബജാജ് എന്ന ആരാധകനാണ് എംഎസ്ഡി ഓട്ടോഗ്രാഫ് നൽകിയത്. താരം ഓട്ടോഗ്രാഫ് നൽകിയ വീഡിയോ സമൂഹമാദ്ധ്യമങ്ങളിൽ പങ്കുവച്ചത് സുമീത് കുമാറാണ്. രണ്ട് മില്യണിലധികം ആളുകളാണ് രണ്ട് ദിവസത്തിനിടെ വീഡിയോ കണ്ടത്. വീഡിയോയ്ക്ക് താഴെ ധോണിയെ പ്രശംസിച്ച് കൊണ്ട് നിരവധി കമന്റുകളാണ് ഉള്ളത്.