2024 ജൂണിൽ നടക്കുന്ന ഐസിസി ടി20 ലോകകപ്പിന് യോഗ്യത നേടി ഉഗാണ്ട. ഇത് ആദ്യമായാണ് ഉഗാണ്ട ഐസിസിയുടെ ലോകകപ്പിന് യോഗ്യത നേടുന്നത്. വാണ്ടറേഴ്‌സ് സ്‌റ്റേഡിയത്തിൽ നടന്ന മത്സരത്തിൽ റുവാണ്ടയെ ഒമ്പത് വിക്കറ്റിന് തകർത്താണ് ഉഗാണ്ട ലോകകപ്പിന് യോഗ്യത നേടിയത്. ഇതോടെ ടി20 ലോകകപ്പിലേക്ക് യോഗ്യത നേടുന്ന അഞ്ചാമത്തെ ആഫ്രിക്കൻ രാജ്യമായി ഉഗാണ്ട മാറി.
2024 ജൂണിൽ അമേരിക്കയിലും വെസ്റ്റ് ഇൻഡീസിലുമായി ഹൈബ്രിഡ് മോഡലിലാണ് ടി20 ലോകകപ്പ് അരങ്ങേറുന്നത്. ലോകകപ്പ് യോഗ്യത മത്സരത്തിലെ ആറിൽ അഞ്ചും ജയിച്ചാണ് ഉഗാണ്ടയുടെ ലോകകപ്പ് പ്രവേശനം. എതിരാളികളായ റുവാണ്ടയെ 10 ഓവർ തികയുന്നതിന് മുമ്പ് 65 റൺസിന് ഓൾഔട്ടാക്കിയാണ് ഉഗാണ്ട ഇന്നത്തെ മത്സരത്തിൽ വിജയം സ്വന്തമാക്കിയത്.
അതേസമയം സിംബാബ്വെയ്‌ക്ക് ഈ ലോകകപ്പിലും യോഗ്യത നേടാൻ കഴിഞ്ഞില്ല. നമീബിയയോടും ഉഗാണ്ടയോടും ഏറ്റുവാങ്ങിയ തോൽവിയാണ് ലോകകപ്പ് യോഗ്യത നഷ്ടമാകാൻ കാരണം. ദിവസങ്ങൾക്ക് മുമ്പ് നമീബിയയും ലോകകപ്പിന് യോഗ്യത നേടിയിരുന്നു.
