മനുഷ്യരെ സംബന്ധിച്ച് ഉറക്ക കുറവ് വലിയ പ്രശ്നങ്ങളിലൊന്നാണ്. നമ്മുടെ മാനസിക-ശാരീരിക ആരോഗ്യത്തെ ഉറക്കം സ്വാധീനിക്കും. ശരിയായ തരത്തിൽ ഉറങ്ങിയില്ലെങ്കിൽ വാഹനം ഓടിക്കുമ്പോൾ നാം മയങ്ങി പോകാറുണ്ട്. ഇത് വലിയ അപകടങ്ങൾ വിളിച്ചു വരുത്തും. പല കാരണങ്ങൾ കൊണ്ട് ഉറക്കം പൂർണമാകാതെ പലപ്പോഴായി നാം ഉണരാറുമുണ്ട്. ഇപ്പോൾ, ചിൻസ്ട്രാപ്പ് പെൻഗ്വിനുകളിൽ നടത്തിയ ഒരു പഠനമാണ് ശ്രദ്ധേയമാകുന്നത്. ചിൻസ്ട്രാപ്പ് പെൻഗ്വിനുകൾ പ്രതിദിനം പതിനായിരക്കണക്കിന് തവണ ഉണരുമെന്നാണ് ഗവേഷകരുടെ കണ്ടുപിടിത്തം.
ദൈനംദിനം ഉറങ്ങുന്ന 11 മണിക്കൂറിൽ ശരാശരി നാല് സെക്കൻഡ് വീതം പെൻഗ്വിനുകൾ പതിനായിരം തവണ ഉണരുന്നു. സയൻസ് എന്ന പേപ്പറിലാണ് ഇത് സംബന്ധിച്ച് പഠനം വന്നിരിക്കുന്നത്. ഇത് പെൻഗ്വിനുകൾ സ്വയം ഉണ്ടാക്കിയെടുത്ത ശീലമായിരിക്കാം എന്നാണ് ഗവേഷകർ പറയുന്നത്. നിരന്തരം ജാഗ്രത പാലിക്കേണ്ടതിന്റെ ഭാഗമായാവാം ഇത്തരത്തിൽ ഇവ ഉണർന്ന് ശീലിച്ചത്. പെൻഗ്വിനിലെ ഏറ്റവും സമൃദ്ധമായ ഇനമാണ് ചിൻസ്ട്രാപ്പ് പെൻഗ്വിനുകൾ(പൈഗോസെലിസ് അന്റാർട്ടിക്കസ്). പ്രധാനമായും അന്റാർട്ടിക്ക പെനിൻസുലയിലും തെക്കൻ അറ്റ്ലാന്റിക് സമുദ്രത്തിലെ ദ്വീപുകളിലും കാണപ്പെടുന്ന ഇവ ഏകദേശം എട്ട് ദശലക്ഷം ജോഡികളുണ്ടാവും.
പങ്കാളികൾ തീറ്റതേടി വലിയ യാത്രകൾ നടത്തുമ്പോൾ തനിച്ചാകുന്ന പെൻഗ്വിനുകൾ അവയുടെ മുട്ടകൾക്ക് കാവൽ നിൽക്കണം. സ്കുവസ് എന്നറിയപ്പെടുന്ന പക്ഷി പെൻഗ്വിനുകളുടെ മുട്ടകൾ വ്യാപകമായി വേട്ടയാടാറുണ്ട്. ഈ പക്ഷിയിൽ നിന്നും മുട്ട സംരക്ഷിക്കാൻ ഇവർ ജാഗരൂകരായിരിക്കും. പങ്കാളി തിരിച്ചെത്തിയാൽ, ദമ്പതികൾ ചുമതല കൈമാറ്റവും ചെയ്യുന്നു. 2019 ഡിസംബറിൽ കിംഗ് ജോർജ്ജ് ഐലൻഡിലെ 14 പക്ഷികളിൽ ലിയോൺ ന്യൂറോ സയൻസ് റിസർച്ച് സെന്ററിലെ പോൾ-ആന്റോയ്ൻ ലിബോറലിന്റെ നേതൃത്വത്തിലുള്ള സംഘം ഇലക്ട്രോഡുകൾ ഘടിപ്പിച്ചു. തലച്ചോറിലെയും കഴുത്തിലെ പേശികളിലെയും വൈദ്യുത പ്രവർത്തനം അവർ ഇതിലൂടെ രേഖപ്പെടുത്തി.
ശരീര ചലനത്തെക്കുറിച്ച് പഠിക്കാൻ അവർ ആക്സിലറോമീറ്ററും ജിപിഎസും ഉപയോഗിച്ചു. വീഡിയോ റെക്കോർഡിംഗും ഒന്നിലധികം ദിവസങ്ങളിലെ നേരിട്ടുള്ള നിരീക്ഷണവും സംയോജിപ്പിച്ച്, പെൻഗ്വിനുകളുടെ നിരവധി പ്രത്യേകതകൾ ഗവേഷകർക്ക് തിരിച്ചറിയാൻ കഴിഞ്ഞു. ഉറക്കം വന്ന് നിൽക്കുമ്പോഴോ മുട്ടകൾ വിരിയിക്കാൻ കിടക്കുമ്പോഴോ ആണ്, ശരാശരി 3.91 സെക്കൻഡ് ഇവ ഞെട്ടി ഉണരുന്നത്. ഇത്തരത്തിൽ ഒരു ദിവസം 10,000-ത്തിലധികം തവണ പെൻഗ്വിനുകൾ ഉണരുകയും ഉറങ്ങുകയും ചെയ്യുന്നു.
മനുഷ്യരിൽ, സ്ലീപ് അപ്നിയ പോലുള്ള ശകലമായ ഉറക്കം വൈജ്ഞാനിക പ്രവർത്തനത്തെ സ്വാധീനിക്കുകയും അൽഷിമേഴ്സ് പോലുള്ള ന്യൂറോ ഡിജനറേറ്റീവ് രോഗത്തിന് കാരണമാവുകയും ചെയ്യും. അതിനാൽ, മനുഷ്യരിൽ അസാധാരണമായത് പക്ഷികളിലോ മറ്റ് മൃഗങ്ങളിലോ, ചില വ്യവസ്ഥകളിലെങ്കിലും തികച്ചും സാധാരണമായിരിക്കും എന്ന് ശാസ്ത്രജ്ഞരായ ക്രിസ്റ്റ്യൻ ഹാർഡിംഗും വ്ലാഡിസ്ലാവ് വ്യാസോവ്സ്കിയും അനുബന്ധ വ്യാഖ്യാനത്തിൽ വ്യക്തമാക്കി.