ഇംഗ്ലീഷ് ഭാഷ വട്ടം കറക്കിയ ചില രസകരമായ സംഭവങ്ങളും ചിലപ്പോൾ കൈപ്പേറിയ സംഭവങ്ങളും നമ്മിൽ പലരുടെയും ജീവിതത്തിലുട്ടായിട്ടുണ്ടാകും. എന്തൊക്കെ വന്നാലും ഈ ഭാഷ പഠിക്കണം എന്നു കരുതി യൂട്യൂബ് ടൂട്ടോറിയൽ വീഡിയോസ് കാണുമ്പോഴോ പലപ്പോഴും വായ പൊളിച്ചിരിക്കേണ്ട അവസ്ഥയാണ് ഉണ്ടാവാറുള്ളത്. ഒന്നും മനസിലാവില്ലെന്നു മാത്രമല്ല എങ്ങനെ പഠിക്കണം എന്നും നമുക്ക് പിടികിട്ടാറില്ല. എന്നാൽ ആ വിഷമങ്ങൾ ഇനി മാറ്റിവച്ചോളൂ.. ഇംഗ്ലീഷ് പഠിക്കണമെന്ന് വിചാരിച്ചിരിക്കുന്നവരുടെ ആത്മവിശ്വാസം വർദ്ധിപ്പിക്കുന്ന ഒരു വീഡിയോയാണ് സമൂഹമാദ്ധ്യമങ്ങളിൽ വൈറലാവുന്നത്.
ഉത്തർപ്രദേശിൽ നിന്നുള്ള യശോദ എന്ന സ്ത്രീയാണ് ‘ ഇംഗ്ലീഷ് വിത്ത് ദേഹതി മാഡം’ എന്ന യൂട്യൂബ് ചാനലിലൂടെ ആളുകളുടെ ശ്രദ്ധ ആകർഷിക്കുന്നത്. വലിയ ടൂട്ടോറിയൽ യൂട്യൂബറുകളെ പോലെ കോട്ടോ സ്യൂട്ടോ ഒന്നും ധരിച്ചല്ല അവർ വീഡിയോ ചെയ്യുന്നത്. ഉത്തർപ്രദേശിലെ ഒരു ഗ്രാമത്തിലെ സാധാരണക്കാരിയാണിവർ. സ്വന്തം ശൈലിയിൽ സാധാരണ വേഷത്തിൽ ടൂട്ടോറിയൽ അവതരിപ്പിക്കുന്ന യശോദയുടെ വീഡിയോയാണ് ഇപ്പോൾ വൈറലായിരിക്കുന്നത്.
ഇംഗ്ലീഷ് പഠിക്കാൻ ആദ്യം തനിക്കും ബുദ്ധിമുട്ടുകൾ നേരിട്ടിരുന്നുവെന്നും എന്നാൽ ദൈനംദിന ജീവിതത്തിൽ ചെയ്യുന്ന ഓരോ കാര്യങ്ങളും ഇംഗ്ലീഷിൽ ചിന്തിക്കുകയും അത് പറയാൻ ശീലിക്കുകയും ചെയ്തതിലൂടെയാണ് തന്റെ ആത്മവിശ്വാസം വർദ്ധിച്ചതെന്നും യശോദ പറയുന്നു. ഇപ്പോഴും തനിക്ക് തെറ്റുപറ്റാറുണ്ടെന്നും എന്നാൽ തെറ്റിൽ നിന്ന് തന്നെയാണ് കൂടുതൽ കാര്യങ്ങൾ പഠിക്കാൻ സാധിക്കാറുള്ളതെന്നും അവർ പറയുന്നുണ്ട്.
യൂട്യൂബിലൂടെ വീഡിയോകൾ സാധാരണക്കാർക്കായി അവർ പങ്കുവക്കുന്നതിനോടൊപ്പം ആളുകളുടെ ആത്മവിശ്വാസവും വർദ്ധിപ്പിക്കുന്നു. നിരവധി ആളുകളാണ് യശോദയ്ക്ക് അഭിനന്ദനങ്ങൾ അറിയിച്ച് രംഗത്തെത്തിയത്. നിരവധി ആളുകൾക്ക് ഇത്തരം വീഡിയോകൾ പ്രചോദനം നൽകുന്നുണ്ടെന്നുള്ള തരത്തിലുള്ള കമന്റുകളും വീഡിയോയ്ക്ക് ലഭിച്ചിട്ടുണ്ട്. 285,000 സബ്സ്ക്രൈബേഴ്സ് ആണ് ഇതിനോടകം ഇവർക്ക് ലഭിച്ചിരിക്കുന്നത്.