വ്യത്യസ്തമായ കഥാപാത്രങ്ങളിലൂടെ ശ്രദ്ധിക്കപ്പെട്ട നടനാണ് കലാഭവൻ ഷാജോൺ. മോഹൻലാലിന്റെ ദൃശ്യം എന്ന സിനിമയിൽ ഷാജോൺ അവതരിപ്പിച്ച സഹദേവൻ എന്ന പോലീസ് കഥാപാത്രം വലിയ രീതിയിൽ ശ്രദ്ധനേടിയിരുന്നു. ഷാജോണിന്റേതായി പുറത്തിറങ്ങാനിരിക്കുന്ന പുതിയ ചിത്രമാണ് അസ്ത്രം. സിനിമയുടെ പ്രമോഷൻ വേളയിലും ദൃശ്യത്തിലെ സഹദേവൻ എന്ന കഥാപാത്രത്തെക്കുറിച്ചുള്ള ഓർമ്മകൾ പങ്കുവച്ചിരിക്കുകയാണ് താരം. ഷാജോണിന്റെ വാക്കുകളിങ്ങനെ..
ഒരു കഥാപാത്രത്തിന്റെ പേരിൽ അറിയപ്പെടുന്നത് അഭിനേതാക്കളെ സംബന്ധിച്ചിടത്തോളം വലിയ ഭാഗ്യമാണ്. മുമ്പൊക്കെ ഒരു സിനിമ കണ്ട് കഴിഞ്ഞാൽ ആരെങ്കിലും വിളിച്ച് അഭിപ്രായങ്ങൾ പറയാറുണ്ട്. മോശമാണെങ്കിൽ മോശമാണെന്നും നല്ലതാണെങ്കിൽ നല്ലതെന്നും പറയും. എന്നാൽ ഇപ്പോൾ ദൃശ്യത്തിലെ സഹദേവൻ എന്ന കഥാപാത്രമാണ് എല്ലാവരുടെയും മനസിലുള്ളത്. ആ കഥാപാത്രത്തെ മറികടക്കാനായി ഒരുപാട് കഷ്ടപ്പെടേണ്ടി വരും.
ഇതുവരെ ചെയ്യാത്ത വേഷങ്ങൾ ചെയ്യുമ്പോഴാണ് ശ്രദ്ധിക്കപ്പെടുന്നത്. വ്യത്യസ്തവും വെല്ലുവിളി നിറഞ്ഞതുമായ കഥാപാത്രങ്ങൾ ചെയ്യുമ്പോൾ ആളുകൾ നമ്മളെ ഓർക്കുന്നു. ഒരിക്കലും ഒരു സംവിധാനയകനോടോ തിരക്കഥാകൃത്തിനോടോ പോയി ആ കഥാപാത്രം എനിക്ക് തരണമെന്ന് പറയാൻ സാധിക്കില്ല. നല്ല വേഷത്തിന് വേണ്ടി കാത്തിരിക്കുകയാണ് ചെയ്യേണ്ടതെന്നും ഷാജോൺ പറഞ്ഞു.