ഇന്ത്യൻ ക്രിക്കറ്റ് ടീമിന്റെ ഏറ്റവും മികച്ച നായകന്മാരിലൊരാളായാണ് എംഎസ് ധോണിയെ ആരാധകർ എന്നും കാണുന്നത്. രോഹിത് ശർമ്മയ്‌ക്ക് കീഴിൽ 2023ലെ ഏകദിന ലോകകപ്പ് ഫൈനലിൽ ഇന്ത്യ തോറ്റതോടെ വീണ്ടും ധോണി ആരാധകരുടെ മനസിലേക്ക് കടന്നുവന്നു. ഐസിസി കിരീടങ്ങൾ നേടാൻ ധോണിയെപ്പോലൊരു ക്യാപ്റ്റനെ സാധിക്കൂ എന്നാണ് ആരാധകർ പറഞ്ഞത്. ധോണിയ്‌ക്ക് കീഴിലാണ് ഇന്ത്യ എല്ലാ ഐസിസി കിരീടങ്ങളും നേടിയത്. എംഎസ്ഡിയ്‌ക്ക് ശേഷം ലോകകിരീടം നേടുക എന്ന ലക്ഷ്യം രോഹിത്തിന് നഷ്ടമായപ്പോൾ രോഹിത്ത് മികച്ച വ്യക്തിയാണെന്ന് പറഞ്ഞ് രംഗത്തെത്തിയിരിക്കുകയാണ് ഇന്ത്യൻ താരം ആർ അശ്വിൻ.
‘ക്രിക്കറ്റിലേക്ക് നോക്കുകയാണെങ്കിൽ എല്ലാവരും എംഎസ് ധോണിയാണ് മികച്ച ക്യാപ്റ്റനെന്ന് പറയും. പക്ഷേ രോഹിത്ത് ശർമ്മയും മികച്ച നായകന്മാരിൽ ഒരാളാണ്. നായകൻ എന്നതിന് പുറമെ മികച്ച വ്യക്തിത്വത്തിന് ഉടമകൂടിയാണ് അദ്ദേഹം. ടീമിലെ എല്ലാ കളിക്കാരെയും മനസിലാക്കാൻ രോഹിത്തിന് സാധിച്ചിട്ടുണ്ട്. ഓരോ കളിക്കാരുടെയും ഇഷ്ടാനിഷ്ടങ്ങളെ പറ്റി അദ്ദേഹത്തിന് നന്നായിട്ടറിയാം. ഓരോ കളിക്കാരനെയും വ്യക്തിപരമായി അറിയാൻ അദ്ദേഹം ശ്രമിക്കുന്നുണ്ട്. ഇത് കളിക്കാർക്കിടയിലെ സൗഹൃദാന്തരീക്ഷം മെച്ചപ്പെടുത്തി. ഓരോ കളിക്കാരന്റെയും പരിശ്രമത്തെ രോഹിത് വിലമതിക്കാറുണ്ട്’.- അശ്വിൻ തന്റെ യൂട്യൂബ് ചാനലിലെ പങ്കെുവെച്ച വീഡിയോയിൽ പറഞ്ഞു.
2023 ലെ ഏകദിന ലോകകപ്പിലെ ആദ്യ മത്സരത്തിൽ മാത്രമാണ് അശ്വിൻ പ്ലേയിംഗ് ഇലവനിൽ ഉണ്ടായിരുന്നത്. ലോകകപ്പിൽ വിന്നിംഗ് കോമ്പിനേഷൻ നിലനിർത്തി പോരാനാണ് രോഹിത് ശ്രമിച്ചത്. താനായിരുന്നു ഇന്ത്യൻ ടീമിന്റെ നായകനെങ്കിൽ ഇതിൽ മാറ്റം വരുത്തുമായിരുന്നെന്നും താരം കൂട്ടിച്ചേർത്തു.
