മുബൈ: നിയമസഭാ തിരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിൽ നാലിടത്തെ വോട്ടെണ്ണൽ ആരംഭിച്ചതോടെ വൻ മുന്നേറ്റമാണ് ബിജെപി കാഴ്ചവയ്ക്കുന്നത്. ഇത്തരത്തിൽ ശക്തമായ മുന്നേറ്റം നടത്താൻ ബിജെപിയെ സഹായിച്ചത് ഇരട്ട എഞ്ചിൻ മികവോടെ പ്രവർത്തിക്കുന്ന സംസ്ഥാന സർക്കാരും പ്രധാനമന്ത്രി നരേന്ദ്രമോദിയുടെ നേതൃത്വത്തിൽ രാജ്യം കൈവരിച്ച വികസന നേട്ടങ്ങളുമാണെന്ന് മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ പ്രതികരിച്ചു.
ഈ തിരഞ്ഞെടുപ്പിൽ മദ്ധ്യപ്രദേശിലും രാജസ്ഥാനിലും മികച്ച പ്രകടനം കാഴ്ച വയ്ക്കാൻ ബിജെപിയുടെ ഡബിൾ എഞ്ചിൻ സർക്കാർ നടത്തിയ പ്രവർത്തനങ്ങൾ ശ്രദ്ധേയമാണ്. ഇതെല്ലാം സാധ്യമായത് പ്രധാനമന്ത്രി നരേന്ദ്രമോദിയുടെ അർപ്പണബോധം കൊണ്ടുതന്നെയാണ്. പ്രധാനമന്ത്രി എപ്പോഴും വികസനത്തിന് ഊന്നൽ നൽകിയാണ് പ്രവർത്തിച്ചിട്ടുള്ളതെന്നും ഷിൻഡെ പറഞ്ഞു.
നിലവിൽ മദ്ധ്യപ്രദേശിൽ 163 സീറ്റുകളിലാണ് ബിജെപി ലീഡ് ചെയ്യുന്നത്. 65 സീറ്റുകളിൽ മാത്രമാണ് കോൺഗ്രസിന്റെ മുന്നേറ്റം. ട്രെൻഡ് നില പരിശോധിക്കുമ്പോൾ കഴിഞ്ഞ തവണത്തേക്കാൾ 35 സീറ്റുകളാണ് ബിജെപി വർദ്ധിപ്പിച്ചിരിക്കുന്നത്. ആകെയുള്ള 230 സീറ്റുകളിൽ കേവല ഭൂരിപക്ഷവും കടന്ന് ബിജെപി ചരിത്ര വിജയം സ്വന്തമാക്കാനുള്ള സാധ്യതയാണ് പ്രകടമാകുന്നത്.
