ഇന്ത്യ ആതിഥേയത്വം വഹിക്കുന്ന കായിക മാമാങ്കത്തിന്റെ ഭാഗമാകാൻ താത്പര്യമുണ്ടെന്ന് ഒളിമ്പ്യനും ജാവ്‌ലിൻ ത്രോ താരവുമായ നീരജ് ചോപ്ര. അത്‌ലറ്റിക് ഫെഡറേഷൻ ഇന്ത്യയിൽ കായികോത്സവം നടത്തുന്നതിനായുള്ള തീവ്ര പരിശ്രമത്തിലാണ്. ലോകത്തെ മറ്റ് താരങ്ങൾക്കൊപ്പം സ്വന്തം നാട്ടിൽ മത്സരിക്കാൻ തനിക്ക് അതിയായ ആഗ്രഹം ഉണ്ടെന്നും ഇന്ത്യൻ എക്‌സ്പ്രസിന് നൽകിയ അഭിമുഖത്തിൽ നീരജ് ചോപ്ര പറഞ്ഞു.
ഇന്ത്യയിൽ അന്താരാഷ്‌ട്രതലത്തിലുള്ള കായിക മാമാങ്കത്തിന് ആതിഥേയത്വം വഹിക്കണം. അതിന്റെ ഭാഗമാകാൻ എനിക്ക് അതിയായ ആഗ്രഹമുണ്ട്. അന്താരാഷ്ട്ര അത്‌ലറ്റുകൾക്കെതിരെ ഇന്ത്യയിൽ മത്സരിക്കാൻ ഞാൻ ശരിക്കും ആഗ്രഹിക്കുന്നു.രാജ്യത്തെ ജനങ്ങളും അത് ആഗ്രഹിക്കുന്നുണ്ട്. ഉടൻ തന്നെ ഇന്ത്യ ഈ കായികമാമാങ്കത്തിന് വേദിയാകുമെന്നാണ് ഞാൻ പ്രതീക്ഷിക്കുന്നത്. അത്‌ലറ്റിക്‌സ് ഫെഡറേഷനും അതിനായി തീവ്ര ശ്രമങ്ങൾ നടത്തുന്നുണ്ട്. – നീരജ് ചോപ്ര പറഞ്ഞു.
2029-ലെ ലോക അത്‌ലറ്റിക് ചാമ്പ്യൻഷിപ്പിന് ഇന്ത്യ വേദിയാകുമെന്ന് റിപ്പോർട്ടുകളുണ്ട്. ഇതിനായി ബിഡ് സമർപ്പിക്കുമെന്ന് അത്‌ലറ്റിക്‌സ് ഫെഡറേഷൻ സീനിയർ വൈസ് പ്രസിഡന്റ് അഞ്ജു ബോബി ജോർജ് പറഞ്ഞതായി ദേശീയമാദ്ധ്യമങ്ങൾ റിപ്പോർട്ട് ചെയ്തിരുന്നു. അതിന് പുറമെ 2030 ലെ യൂത്ത് ഒളിമ്പിക്‌സിനും 2036 ലെ ഒളിമ്പിക്‌സിനും ആതിഥേയത്വം വഹിക്കാൻ ഇന്ത്യ താത്പര്യം പ്രകടിപ്പിച്ചിട്ടുണ്ട്. ചെക്ക് റിപ്പബ്ലിക്കിന്റെ ജാൻ സെലെസ്നിക്കും നോർവേയുടെ ആൻഡ്രിയാസ് തോർക്കിൽഡ്സണിനും ശേഷം ഒളിമ്പിക്, ലോക ചാമ്പ്യൻഷിപ്പ് കിരീടങ്ങൾ നേടുന്ന ചരിത്രത്തിലെ മൂന്നാമത്തെ ജാവലിൻ ത്രോ താരമാണ് നീരജ് ചോപ്ര.
