ന്യൂയോർക്ക്: ലാറ്റിനമേരിക്കൻ പാട്ടുകളിലൂടെ ശ്രദ്ധേയനായ പ്യൂർട്ടോറിക്കൻ റാപ് സൂപ്പർതാരം ഡാഡി യാങ്കി സംഗീതം മതിയാക്കി. അവസാനത്തെ സംഗീത പര്യടനം നാട്ടിലെ വേദിയിൽ സംഘടിപ്പിച്ചാണ് സംഗീത സപര്യക്ക് താരം വിരാമമിട്ടത്. ഗാസൊലീന, ഡെസ്പാസിറ്റോ തുടങ്ങിയ പാട്ടുകളിലൂടെയാണ് താരം ആരാധക മനസുകളിൽ ചേക്കേറിയത്.
ശിഷ്ട ജീവിതം സഭയ്ക്കും സുവിശേഷത്തിനുമായി മാറ്റിവയ്‌ക്കുന്നതായും താരം അറിയിച്ചു. ബാരിയോ ഫിനോ, കോൺ കാൽമ, റൊംപെ തുടങ്ങിയവയാണ് ഹിറ്റായ മറ്റു പാട്ടുകൾ. ഡാഡി യാങ്കിയെപ്പോലെ പ്യൂർട്ടോറിക്കൻ ഗായകർ ഒട്ടേറെപ്പേർ സുവിശേഷ ജീവിതത്തിനായി പാട്ടു നിർത്തിയവരാണ്
‘ഒരുവൻ ലോകം മുഴുവൻ നേടിയാലും ആത്മാവ് നഷ്ടപ്പെട്ടാൽ എന്തു പ്രയോജനം’ എന്നു ചോദിച്ചാണ് താരം കണ്ണീർ വാർത്തത്. ഇനി റമോൺ അയാല റോഡ്രിഗൂസ് എന്ന യഥാർഥ പേരിലേക്ക് മടങ്ങുമെന്നും 46-കാരൻ പ്രഖ്യാപിച്ചു.
