ആഗോള ടെക് ഭീമന്മാരായ ആപ്പിളിന്റെ പുതിയ സീരിസ് ഐഫോൺ 16-ന്റെ ബാറ്ററികൾ ഇന്ത്യയിൽ നിർമ്മിക്കാൻ താത്പര്യമറിയിച്ച് കമ്പനി. ഇന്ത്യയിലെ ഡീലർമാരോട് ആപ്പിൾ ഇക്കാര്യം വ്യക്തമാക്കിയെന്നാണ് പുറത്തുവരുന്ന റിപ്പോർട്ടുകൾ. നിലവിൽ ചൈനയിലാണ് കമ്പനി ബാറ്ററികൾ നിർമ്മിക്കുന്നത്. ഇത് മാറ്റി ഉത്പ്പാദന
വിതരണ ശൃംഖല വിപുലീകരിക്കാനാണ് ആപ്പിൾ ലക്ഷ്യം വെക്കുന്നത്.
രാജ്യത്ത് കമ്പനിയുടെ നിർമ്മാണ ശേഷി വർദ്ധിപ്പിക്കാനുള്ള നീക്കത്തിന്റെ ഭാഗമാണിത്. ഇന്ത്യയിൽ പുതിയ ഫാക്ടറികൾ സ്ഥാപിക്കാൻ ചൈനയിലെ ഡെസെ അടക്കമുള്ള ബാറ്ററി നിർമ്മാതക്കളുമായി ആപ്പിൾ ചർച്ച നടത്തിയിരുന്നു. ആപ്പിളിന്റെ തായ്വാനീസ് ബാറ്ററി വിതരണക്കാരായ സിംപ്ലോ ടെക്നോളജിയോടും അവരുടെ ഉത്പാദന ശേഷി ഇന്ത്യയിലേക്ക് വിപുലീകരിക്കണമെന്ന് അമേരിക്കൻ ആപ്പിൾ ആവശ്യപ്പെട്ടിട്ടുണ്ട്.
അതേസമയം, ഇലക്ട്രോണിക്സ് പാർട്സ് നിർമ്മാതാക്കളായ ജാപ്പനീസ് കമ്പനി ടിഡികെ കോർപ്പറേഷൻ ആപ്പിൾ ഐഫോണുകൾക്കായി ഇന്ത്യയിൽ ലിഥിയം അയൺ ബാറ്ററി സെല്ലുകൾ നിർമ്മിക്കുമെന്ന് കേന്ദ്രമന്ത്രി രാജീവ് ചന്ദ്രശേഖർ വ്യക്തമാക്കിയിരുന്നു.