കോട്ടയം: പരീക്ഷാ ടൈംടേബിൾ പ്രസിദ്ധീകരിച്ചതോടെ നിരാശരായി വിദ്യാർത്ഥികൾ. ഡിസംബർ 12 ന് ആരംഭിക്കുന്ന പരീക്ഷ 22 നാണ് അവസാനിക്കുന്നത്. അതിനാൽ കുട്ടികൾക്ക് ക്രിസ്തുമസ് ആഘോഷങ്ങൾ ഉണ്ടാകില്ല. ഹയർസെക്കൻഡറി പരീക്ഷ ടൈംടേബിളാണ് വിദ്യാർത്ഥികൾക്ക് വിനയായിരിക്കുന്നത്.
ഇതോടെ ആഘോഷങ്ങൾക്ക് സമയം നൽകാതെ തയ്യാറാക്കിയിരിക്കുന്ന രണ്ടാം പാദ പരീക്ഷ ടൈംടേബിൾ പുതുക്കണമെന്ന് ആശ്യപ്പെട്ടിരിക്കുകയാണ് അദ്ധ്യാപകർ. ഒരേ സ്കൂളില് ഹൈസ്കൂള് വിഭാഗത്തില് 21-നും ഹയര്സെക്കന്ഡറി വിഭാഗത്തില് 22-നുമാണ് പരീക്ഷകള് തീരുന്നത്.
ഡിസംബർ 22 ന് ഉച്ചകഴിഞ്ഞ് രണ്ടുമുതല് ഒന്നാംവര്ഷ ഹയര്സെക്കന്ഡറി വിദ്യാർത്ഥികൾക്ക് ബയോളജി, പൊളിറ്റിക്കല് സയന്സ്, കമ്പ്യൂട്ടര് ആപ്ലിക്കേഷന്സ്, ഇലക്ട്രോണിക്സ്, സംസ്കൃത സാഹിത്യം തുടങ്ങിയ വിഷയങ്ങളിലാണ് പരീക്ഷ ഉള്ളത്. രാവിലെ രണ്ടാംവര്ഷ വിദ്യാർത്ഥികൾക്ക് ഇക്കണോമിക്സ്, ഇലക്ട്രോണിക് സിസ്റ്റംസ് എന്നിവയുടെ പരീക്ഷയാണ്. ഹയര്സെക്കന്ഡറിയില് 12-നും ഹൈസ്കൂളില് 13-നുമാണ് പരീക്ഷ ആരംഭിക്കുന്നത്.