ഐപിഎൽ 16-ാം സീസണിന്റെ താര ലേലത്തിന്റെ അന്തിമ പട്ടികയായി. ആകെയുള്ള 77 പേരുടെ സ്ലോട്ടിൽ 333 പേരുടെ ചുരുക്ക പട്ടികയാണ് പുറത്തിറക്കിയിരിക്കുന്നത്. ഡിസംബർ 19ന് ദുബായിൽ നടക്കുന്ന മിനി ലേലത്തിൽ പത്തു മലയാളികളും ഇടംപിടിച്ചിട്ടുണ്ട്. ഇന്ത്യൻ സമയം 2.30നാണ് ലേല നടപടികൾ ആരംഭിക്കുക. ചുരുക്ക പട്ടികയിൽ 333 താരങ്ങളാണ് ഇടംപിടിച്ചിരിക്കുന്നത്.
77 സ്ലോട്ടുകളാണ് നിലവില്‍ ഒഴിവുള്ളത്. 30 എണ്ണം വിദേശ താരങ്ങള്‍ക്ക് വേണ്ടിയാണ്. 214 ഇന്ത്യന്‍ താരങ്ങളും 199 വിദേശ താരങ്ങളുമാണ് അന്തിമ പട്ടികയിൽ ഇടംപിടിച്ചത്. 116 ക്യാപ്ഡ് താരങ്ങളും 215 അണ്‍ക്യാപ്ഡ് താരങ്ങളുമുണ്ട്. അസോസിയേറ്റ് രാജ്യത്ത് നിന്ന് രണ്ടുപേരും പട്ടികയിലുണ്ട്.
30 ലക്ഷം രൂപ അടിസ്ഥാന വിലയുളള ബേസില്‍ തമ്പിയും എസ് മിധുനും ആണ് താരലേലത്തില്‍ പങ്കെടുക്കുന്ന വിലയേറിയ താരങ്ങള്‍.രോഹൻ കുന്നുമ്മല്‍ (20 ലക്ഷം), ശ്രേയസ് ഗോപാല്‍ (20 ലക്ഷം), സല്‍മാന്‍ നിസാര്‍ (20 ലക്ഷം), പിഎ അബുല്‍ (20 ലക്ഷം), വൈശാഖ് ചന്ദ്രന്‍ (20 ലക്ഷം), കെഎം ആസിഫ് (20 ലക്ഷം), അകിന്‍ സത്താര്‍ (20 ലക്ഷം) എന്നിങ്ങനെയാണ് മറ്റ് കേരള താരങ്ങളുടെ അടിസ്ഥാന വില. കേരളത്തിനായി കളിക്കുന്ന ജലജ് സക്‌സേന 40 ലക്ഷം അടിസ്ഥാന വിലയായി പട്ടികയിലുണ്ട്. സഞ്ജു സാംസണെ രാജസ്ഥാനും വിഷ്ണു വിനോദിനെ മുംബൈ ഇന്ത്യന്‍സും നിലനിർത്തിയിട്ടുണ്ട്.
ഹർഷൽ പട്ടേൽ, ഷർദൂൽ താക്കൂർ,ഉമേഷ് യാദവ് എന്നിവരാണ് രണ്ടുകോടി അടിസ്ഥാന വിലയുളള ഇന്ത്യൻ താരങ്ങൾ. ട്രാവിസ് ഹെഡ്, ജെറാൾഡ് കോട്ട്സെ,മിച്ചൽ സ്റ്റാർക്ക്, റാസി വാൻഡർ ദസൻ, പാറ്റ് കമ്മിൻസ് എന്നിവരടമുള്ളവർക്കും രണ്ടു കോടിയാണ് അടിസ്ഥാന വില.
