പെർത്തിൽ ഓസ്ട്രേലിയയ്ക്കെതിരായി നടന്ന ആദ്യ ടെസ്റ്റിൽ സ്ലോ ഓവർ റേറ്റ് നിലനിർത്തിയതിന് പാകിസ്താന് പിഴ. മാച്ച് ഫീയുടെ 10 ശതമാനം പിഴയും രണ്ട് ഡീമെറിറ്റ് പോയിന്റുകൾ ശിക്ഷയായും വിധിച്ചിട്ടുണ്ടെന്ന് അന്താരാഷ്ട്ര ക്രിക്കറ്റ് കൗൺസിൽ (ഐസിസി) അറിയിച്ചു. മത്സരത്തിന്റെ നിശ്ചിത സമയത്ത് പാകിസ്താൻ രണ്ട് ഓവർ കുറവുവരുത്തിയെന്ന് മാച്ച് റഫറിമാരുടെ എലൈറ്റ് പാനലായ ജഗവൽ ശ്രീനാഥ് വിലയിരുത്തുകയായിരുന്നു.
ഐസിസി ആർട്ടിക്കിൾ 2.22 അനുസരിച്ചാണ് സ്ലോ ഓവർ റേറ്റിന് പിഴ ചുമത്തുന്നത്. ഓരോ ഓവറിനും കളിക്കാർക്ക് അവരുടെ മാച്ച് ഫീയുടെ അഞ്ച് ശതമാനമാണ് പിഴത്തുക. കൂടാതെ, ഐസിസി വേൾഡ് ടെസ്റ്റ് ചാമ്പ്യൻഷിപ്പ് പ്ലേയിംഗ് റെഗുലേഷന്റെ ആർട്ടിക്കിൾ 16.11.2 പ്രകാരം, പൂർത്തിയാക്കാത്ത ഓരോ ഓവറിനും ഒരു പോയിന്റ് പിഴ ചുമത്തുന്നുണ്ട്. അതിനാൽ പാകിസ്താന്റെ ലോക ടെസ്റ്റ് ചാമ്പ്യൻഷിപ്പ് പോയിന്റിലും രണ്ട് ഡീമെറിറ്റ് പോയിന്റുകൾ കുറഞ്ഞു. – ഐസിസി പ്രസ്താവനയിൽ അറിയിച്ചു.
പാകിസ്താൻ ക്യാപ്റ്റൻ ഷാൻ മസൂദ് കുറ്റം സമ്മതിക്കുകയും പിഴ അംഗീകരിക്കുകയും ചെയ്തു. അതിനാൽ ഔപചാരിക വാദം കേൾക്കേണ്ട ആവശ്യമില്ലെന്ന് ഐസിസി വ്യക്തമാക്കി. ഓൺ ഫീൽഡ് അംപയർമാരായ ജോയൽ വിൽസൺ, റിച്ചാർഡ് ഇല്ലിംഗ്വർത്ത്, തേർഡ് അമ്പയർ മൈക്കൽ ഗോഫ്, ഫോർത്ത് അമ്പയർ ഡൊണോവൻ കോച്ച് എന്നിവരാണ് കുറ്റം ചുമത്തിയത്.