തിരുവനന്തപുരം: തനിക്കും കുടുംബത്തിനും ജീവിക്കാൻ വഴിയില്ല, കുടുംബത്തോടൊപ്പം ജീവനൊടുക്കാൻ അനുവാദം നൽകണമെന്നാവശ്യപ്പെട്ട് വനം റേഞ്ച് ഓഫീസർ വകുപ്പ് മേധാവിക്ക കത്ത് അയച്ചു. മൂന്നാർ വർക്കിംഗ് പ്ളാൻ റേഞ്ച് ഓഫിസർ പി.അബ്ദുൽ ജലീലാണ് മേലുദ്യോഗസ്ഥന്റെ പീഡനം കാരണം ആത്മഹത്യ ചെയ്യാൻ അനുവദിക്കണമെന്നാവശ്യപ്പെട്ട് വനം മേധാവിക്കും ഭരണവിഭാഗം എപിസിസിഎഫിനും കത്ത നൽകിയത്. കൂടാതെ
അർഹതപ്പെട്ട ശമ്പളവും ആനുകൂല്യങ്ങളും അന്യായമായി തടഞ്ഞുവെക്കുകയാണെന്നും കത്തിൽ ചൂണ്ടിക്കാട്ടുന്നുണ്ട്.
ജോലിയിൽ നിന്നു നീക്കം ചെയ്യൽ, സ്ഥലംമാറ്റം, സസ്പെൻഷൻ, സ്വയം വിരമിക്കൽ എന്നിവ സംബന്ധിച്ച് തീരുമാനമെടുക്കണമെന്നും കുറിപ്പിൽ ആവശ്യപ്പെടുന്നുണ്ട്. കൃത്യമായ ശമ്പളം നൽകാതെയും അർഹതപ്പെട്ടവ പ്രോവിഡന്റ് ഫണ്ട് പിൻവലിക്കാൻ സമ്മതിക്കാതെയും മൂന്നാർ വർക്കിംഗ് പ്ലാൻ ഓഫിസർ വേട്ടയാടുകയാണെന്നും ഇത് തന്നെയും കുടുംബത്തെയും സാമ്പത്തിക പ്രതിസന്ധിയിലാക്കിയെന്നും കത്തിൽ ആരോപിക്കുന്നുണ്ട്.
സഹപ്രവർത്തകർക്ക് ശമ്പളവും മറ്റാനുകൂല്യങ്ങളും കൃത്യമായി അനുവദിക്കുമ്പോൾ, റേഞ്ച് ഫോറസ്റ്റ് ഓഫിസർമാർക്ക് ലഭിക്കേണ്ട അർഹതപ്പെട്ട ആനുകൂല്യങ്ങൾ വർക്കിംഗ് പ്ലാൻ ഓഫിസർ തടഞ്ഞുവയ്ക്കുകയാണെന്ന് കത്തിൽ പറയുന്നു.