മലയാള സിനിമയുടെ അമ്മയെന്ന വിശേഷണത്തിനുടമയാണ് കവിയൂർ പൊന്നമ്മ. നൂറോളം നടീനടന്മാരുടെ അമ്മയായി അഭിനയിച്ച നടിയെന്ന റെക്കോർഡും കവിയൂർ പൊന്നമ്മയ്ക്ക് മാത്രം സ്വന്തമാണ്. അതുകൊണ്ട് തന്നെ അമ്മയായി മാത്രം വേഷമിട്ട സിനിമകളുടെ എണ്ണമെടുത്താൽ തീരുകയില്ല. ഇപ്പോൾ അഭിനയത്തിൽ നിന്ന് തന്നെ ഇടവേളയെടുത്ത് വിശ്രമ ജീവിതത്തിലാണ് കവിയൂർ പൊന്നമ്മ.
View this post on Instagram
എറണാകുളത്ത് വടക്കൻ പറവൂരിലെ കരിമാളൂരിലെ വസതിയിലാണ് കവിയൂർ പൊന്നമ്മ ഇപ്പോഴുള്ളത്. നടിയുടെ സുഖവിവരങ്ങൾ അറിയാനായി വീട്ടിലെത്തി സന്ദർശനം നടത്തിയിരിക്കുകയാണ് മലയാളികളുടെ പ്രിയപ്പെട്ട സംവിധായകൻ ഷാജി കൈലാസ്, ഒപ്പം ഭാര്യ ചിത്ര ഷാജി കൈലാസുമുണ്ടായിരുന്നു. കവിയൂർ പൊന്നമ്മയ്ക്കൊപ്പമുള്ള ചിത്രങ്ങൾ ഷാജി കൈലാസ് സമൂഹാദ്ധ്യമങ്ങളിലൂടെ പങ്കുവെച്ചിട്ടുണ്ട്.
‘എന്റെ പ്രിയപ്പെട്ട പൊന്നു അമ്മയോടൊപ്പം വിലപ്പെട്ട കുറച്ച് സമയം ചിലവഴിക്കാൻ കഴിഞ്ഞതിൽ അതിയായ സന്തോഷമുണ്ട്. ദൈവത്തിന്റെ കൃപയും അനുഗ്രഹവും നിറഞ്ഞുനിന്ന നിമിഷങ്ങൾ. സർവ്വശക്തൻ എന്റെ പൊൻ അമ്മയ്ക്ക് എല്ലാ ആരോഗ്യവും സന്തോഷവും നൽകി അനുഗ്രഹിക്കട്ടെ.’ ഷാജി കൈലാസ് കുറിച്ചു.
ആറ് പതിറ്റാണ്ടുകാലം മലയാള സിനിമയിൽ നിറഞ്ഞുനിന്ന നടിയാണ് കവിയൂർ പൊന്നമ്മ. 700-ഓളം സിനിമകളിലാണ് പൊന്നമ്മ അഭിനയിച്ചിട്ടുള്ളത്. 2021 ൽ പുറത്തിറങ്ങിയ ആണും പെണ്ണും എന്ന ആന്തോളജി ചിത്രത്തിലായിരുന്നു അവസാനമായി അഭിനയിച്ചത്.
