വിമർശകരുടെ നെഞ്ചിൽ സഞ്ജുവിന്റെ കന്നി സെഞ്ച്വറി; മസിൽ പെരുപ്പിച്ച് ആഘോഷം കൊഴുപ്പിച്ച് മലയാളി താരം

ഇന്ത്യൻ ടീമിലേക്കുള്ള തിരിച്ചുവരവിൽ വിമർശകർക്ക് ബാറ്റുകൊണ്ട് മറുപടി കൊടുത്ത് മലയാളി താരം സഞ്ജു സാംസൺ. ദക്ഷിണാഫ്രിക്കയ്‌ക്കെതിരായ മൂന്നാം ഏകദിനത്തിലാണ് സെഞ്ച്വറിയുമായി സഞ്ജു സാംസൺ തിളങ്ങിയത്. മത്സരത്തിന്റെ 44.5 ഓവറിൽ 110 പന്തുകളിൽ നിന്നാണ് സഞ്ജു സെഞ്ച്വറി നേടിയത്. രണ്ട് സിക്‌സറുകളും ആറ് ബൗണ്ടറികളുമടങ്ങുന്നതാണ് താരത്തിന്റെ ഇന്നിംഗ്‌സ്. ഡെക്ക് ഔട്ടിൽ നോക്കി മസിൽ പെരുപ്പിച്ചാണ് താരം തന്റെ സെഞ്ച്വറി ആഘോഷിച്ചത്.

വൺഡൗണായി ഇറങ്ങിയ താരം 114 പന്തിൽ നിന്ന് 108 റൺസുമായി കൂടാരം കയറി. ലിസാഡ് വില്യംസാണ് താരത്തിന്റെ വിക്കറ്റെടുത്തത്. കഴിഞ്ഞ മത്സരത്തിൽ അവസരം കിട്ടിയിട്ടും മികച്ച പ്രകടനം കാഴ്ചവയ്‌ക്കാനാവാതെ 12 റൺസുമായി താരം മടങ്ങിയിരുന്നു. ഇത് വൻതോതിലുള്ള വിമർശനങ്ങൾക്ക് വഴിവെച്ചിരുന്നു. ഈ വിമർശകർക്കുള്ള മറുപടിയാണ് പക്വതയാർന്ന പ്രകടനത്തിലൂടെ താരം നൽകിയത്.